Արևմտյան Հայաստանի պատասխանը Արևելյան Թուրքիան է ու Արևմտյան Ադրբեջանը։ Պետք է առերեսվենք այս փաստի հետ. Փաշինյան

Հաջորդ շաբաթ կհրապարակվի Սահմանադրության նախնական նախագիծը։ Այս մասին այսօր կառավարության նիստում հայտարարեց Նիկոլ Փաշինյանը։

«Օրինակ՝ «Հայաստան» խմբակցությունը, որի մաս է նաև ՀՅԴ-ն, արդյոք հավատարի՞մ է Միացյալ Հայաստանի տեսլականին, ՀՅԴ-ի ծրագրային տեսլականին։ Նրանք այս հարցին պետք է հստակ պատասխան տան, որովհետև սա ուղիղ կապ ունի այն հարցի հետ, թե ինչու են այդ քաղաքական ուժերն այդքան դեմ Սահմանադրական փոփոխություններին և ինչու են այդքան հիշատակում 1990 թվականի Անկախության հռչակագիրը։

Մենք պետք է արձանագրենք, որ 1990 թվականի օգոստոսի 23-ի Անկախության հռչակագրով անցում ենք կատարել Խորհրդային Հայաստանից Դաշնակցական Հայաստանի։ Որովհետև մենք ՀՅԴ-ի Միացյալ Հայաստանի տեսլականը դրել ենք մեր պետության հիմքում»,- ասաց Փաշինյանը։

Փաշինյանը վերլուծեց նաև Անկախության հռչակագիրը՝ նշելով, որ դրանում հիշատակվում է Արևմտյան Հայաստանը, ինչպես նաև հղում կա ԼՂ ինքնավար մարզի և Խորհրդային Հայաստանի վերամիավորման գործընթացին։

«Հիմա շատ կարևոր է արձանագրել, թե ինչու չպետք է մենք Սահմանադրության մեջ կապ ունենանք այս դրույթների հետ։ Որովհետև այդ փաստաթուղթն ապահովել է ՀՀ-ի այնպիսի դիրքավորում, որը կոնֆլիկտային տրամաբանության մեջ է դրել ՀՀ-ին, և մենք ՀՀ-ն պետք է դուրս դնենք կոնֆլիկտային տրամաբանությունից։

Որովհետև Արևմտյան Հայաստանի պատասխանը Արևելյան Թուրքիան է ու Արևմտյան Ադրբեջանը։ Պետք է առերեսվենք այս փաստի հետ։

«Ուժեղ Հայաստան» խմբակցությանը հարց եմ տալիս՝ արդյոք իրենք պաշտպանո՞ւմ են Ղարաբաղի և Ադրբեջանի հայության վերադարձի իրավունքը։ Այս հարցին պետք է հստակ պատասխանեն։ Ուղիղ ասում եմ՝ սրանք թակարդ հարցեր են։ Որովհետև մի դեպքում նրանք պետք է արձանագրեն մեր քաղաքական նպատակադրումների արդարությունը, մյուս դեպքում՝ պետք է հրաժարվեն իրենց քաղաքական ինքնությունից։

Եթե «Հայաստան», «Ուժեղ Հայաստան» խմբակցությունները պաշտպանում են Ադրբեջանի հայերի վերադարձի իրավունքը, դրա արձագանքը 300 հազար ադրբեջանցիներն են»,– ասաց Փաշինյանը։

Արփինե ՍԻՄՈՆՅԱՆ

Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը:

Leave a comment