«Ուժեղ Հայաստանի» առաջնորդ Սամվել Կարապետյանի նկատմամբ տեղի է ունենում աբսուրդային աննախադեպ «իրավական» երևույթ: Այդ մասին լրագրողների հետ զրույցում հայտարարել է փաստաբան Ռուբեն Հակոբյանը:
Պատասխանելով այն հարցին, թե ինչ հիմքեր են նշված Կարապետյանի կալանավորման որոշման մեջ, փաստաբանը նշել է, որ քանի որ դատական ակտով բավարարվել է քննիչի միջնորդությունը, ուրեմն դատարանը հիմնավորված է համարել հիմնավոր կասկածի առկայությունը, ինչպես նաև հաստատել է ձերբակալման իրավաչափությունը, որը պաշտպանական կողմը բողոքարկել էր, և քննիչի ներկայացրած երեք խափանման միջոցներից գտել է, որ առավել հիմնավորված է քննությանը խոչընդոտելու ռիսկը:
Տեղի ունեցողն արդեն իսկ առկա խափանման միջոցի՝ տնային կալանքի ֆոնին փաստաբանն անհեթեթություն է որակել, քանի որ մարդը չի կարող գտնվել տնային կալանքի տակ, և առանց այդ խափանման միջոցի փոփոխության՝ նրա նկատմամբ կիրառվի ևս մեկ խափանման միջոց՝ կալանքի տեսքով: «Սա աբսուրդային իրավիճակ է: Ստացվում է, որ այս պահին Սամվել Կարապետյանի նկատմամբ կիրառված է կալանքի ձևով երկու խափանման միջոց։ Եվ համաձայն հայրենական օրենսդրության և ՄԻԵԴ նորմերի՝ դրանք նույնական են։ Հետևաբար, այս պահին Սամվել Կարապետյանի նկատմամբ կիրառված է և՛ տնային կալանք, և՛ կալանք։ Տեսականորեն ենթադրենք՝ դատարանը մասնակիորեն բավարարեր միջնորդությունը և որոշեր խափանման միջոցը տնային կալանքի տեսքով։ Ինչպե՞ս կվարվեին այդ դեպքում, երկու ձեռքերին կամ ոտքերին էլ էլեկտրոնային սարքե՞ր կամրցնեին։ Սա աննախադեպ իրավական երևույթ է։ Մեր իրավակիրառ պրակտիկայում ես նման բանի չեմ հանդիպել»,- նշել է Հակոբյանը:
Անդրադառնալով հարցին, թե սովորաբար խափանման միջոցը փոխվում է պայմանների խախտման դեպքում, և մասնավորապես ինչն է խախտվել, փաստաբանը նշել է, որ պաշտպանությունն սկզբից ևեթ բողոքարկել է ձերբակալման իրավաչափությունը: Փաստաբանը պարզաբանել է, որ գոյություն ունի ձերբակալման երեք տեսակ. հանցանք կատարելու անմիջական կասկածանքով՝ սա այդ իրավիճակը չէ։ Երկրորդ՝ երբ մեղադրյալը խախտում է խափանման միջոցի պայմանները, սա ևս այդ իրավիճակը չէ, ընդհակառակը, այլ վարույթով կիրառված խափանման միջոցն աստիճանաբար մեղմացվում է։ Երրորդը՝ երբ ազատության մեջ գտնվող մեղադրյալին ձերբակալում են դատարան ներկայացնելու նպատակով։ Քննիչը Սամվել Կարապետյանին ձերբակալել է այս հիմքով։ Ստացվում է, որ Սամվել Կարապետյանը գտնվում է տնային կալանքի տակ, բայց քննիչը կարծում է, որ նա ազատության մեջ է։ Քննչական մարմնի ներկայացուցիչները փորձել են հետաքրքիր հիմնավորումներ ներկայացնել՝ պնդելով, թե այլ տարբերակներ չկան. «Իրավիճակը հարմարեցվում է փաստերին, բայց նրանց մտքով չի անցնում, որ օրենսդիրը, սահմանելով ձերբակալման երեք տեսակ, որոշել է, որ եթե մարդն ազատության մեջ չէ, ուրեմն նա չի կարող ձերբակալվել, հետևաբար ձերբակալումն ակնհայտորեն ոչ իրավաչափ է։ Սա բարդ իրավական խնդիր չէ, բայց Սամվել Կարապետյանի դեպքում գործում է ինչ-որ այլ քրեական արդարադատություն կամ հատուկ քրեական արդարադատություն, որի մասին մենք չգիտենք»։
Փաստաբանը նշել է, որ որոշումը կբողոքարկվի դրա անհիմն և անօրինական լինելու ակնհայտության հիմքով: Ըստ նրա՝ ուսումնասիրությունը ցույց է տվել, որ նմանատիպ իրավիճակի նախադեպ, երբ տնային կալանքի տակ գտնվող անձը ձերբակալվել է, եղել է 2023 թվականին, երբ քննչական մարմինները Հակակոռուպցիոն դատարան միջնորդություն էին ներկայացրել տնային կալանքի տակ գտնվող ձերբակալվածի կալանավորման վերաբերյալ: Հակակոռուպցիոն դատարանը մերժել էր միջնորդությունը: Դատախազը բողոքարկել էր դատարանի որոշումը, և արդեն 2024 թվականին վերաքննիչ ատյանը գտել էր, որ առաջին ատյանի դատարանը վարվել է իրավաչափորեն, քանի որ միևնույն անձը չի կարող միաժամանակ գտնվել տնային կալանքի և կալանքի տակ, և տնային կալանքի տակ գտնվող անձը չի կարող համարվել ազատության մեջ գտնվող և ձերբակալվել: Արդյունքում բողոքը մերժվել էր: Վերաքննիչ ատյանի որոշումն ընդունվել էր դատավոր Նահապետյանի նախագահությամբ, որն այժմ զբաղեցնում է Հակակոռուպցիոն կոմիտեի նախագահի պաշտոնը, նշել է Հակոբյանը: Ըստ նրա՝ ստացվում է, որ մյուս մեղադրյալների նկատմամբ օրենքը կիրառվում է մի չափանիշներով, իսկ Սամվել Կարապետյանի նկատմամբ՝ այլ: Մեկնաբանություններն այստեղ ավելորդ են, նկատել է փաստաբանը:
Նոր մեղադրանքի էության մասով պաշտպանական կողմը պնդում է, որ Սամվել Կարապետյանը ոչ միայն որևէ առնչություն չունի դեպքի կամ դեպքերի հետ, այլև հիմնավոր կերպով ներկայացնում է և կներկայացնի հանրությանը, որ Կարապետյանին վերագրվող արարքը չի կարող հանցագործություն համարվել: Ներկայացվում են թվեր, մատնանշվում է 64 միլիարդի վնաս. ո՛չ միայն 64 միլիարդի, այլև նույնիսկ 64 դրամի վնաս չի պատճառվել, մինչդեռ օգուտը միլիոններով է հաշվվում: Այս ամենը մանրամասնորեն կներկայացվի ապագայում, խոստացել է փաստաբանը:
Նա ուշադրություն է հրավիրել ևս մեկ ուշագրավ հանգամանքի վրա. նախորդ վարույթի շրջանակում գործել է 53-55 քննիչից բաղկացած քննչական խումբ: Այս վարույթի շրջանակում քննչական խումբը բաղկացած է 91 քննիչից, այսինքն՝ երկու անգամ ավելի շատ: «Ցավում եմ, որ մեր իրավապահ կառույցները նման ռեսուրսներ են վատնում գոյություն չունեցողն ապացուցելու համար: Պարզապես աղմուկ են բարձրացնում»,- ընդգծել է փաստաբանը՝ հրաժարվելով հայտնել, թե արդյոք ներգրավված են այլ անձինք: Ընդ որում, նա հիշեցրել է, որ մեղադրանքում առկա են «խմբի կազմում» ձևակերպումները, ինչը վկայում է այլ ֆիգուրանտների առկայության մասին: Անուններ նշել չեմ կարող»,- կրկնել է փաստաբանը: