ՀՀ սփյուռքի գործերի գլխավոր հանձնակատար Զարեհ Սինանյանն աշխատանքային այցով գտնվում է Թուրքիայի Հանրապետության Ստամբուլ քաղաքում։
Այցի շրջանակում գլխավոր հանձնակատարն այցելել է Ստամբուլում գործող Գարակէօզեան հայկական վարժարան, որն ավելի քան մեկ դար կարևոր դերակատարում ունի տեղի հայ համայնքի կրթական կյանքում։
Զարեհ Սինանյանը հանդիպել է վարժարանի տնօրինության, հոգաբարձուների խորհրդի և վարչական կազմի ներկայացուցիչների հետ։
Հանդիպման ընթացքում քննարկվել են շուրջ 220 աշակերտ ունեցող կրթօջախի գործունեությանը, կրթական գործընթացի կազմակերպմանը և զարգացման հեռանկարներին առնչվող հարցեր։
Առանձնահատուկ ուշադրություն է դարձվել Ստամբուլի հայ համայնքի կրթական կյանքի առանձնահատկություններին, հայկական կրթական հաստատությունների առջև ծառացած մարտահրավերներին, ինչպես նաև Հայաստանի Հանրապետության և տեղի հայ համայնքի միջև կրթական ու մշակութային կապերի ամրապնդման և համագործակցության ընդլայնման հնարավորություններին։
Զարեհ Սինանյանն ընդգծել է հայկական կրթական հաստատությունների առանցքային նշանակությունը հայապահպանության, ազգային և մշակութային ինքնության պահպանման, հայոց լեզվի ու մշակութային ժառանգության փոխանցման, ինչպես նաև երիտասարդ սերնդի հայեցի կրթության և դաստիարակության գործում՝ կարևորելով դրանց գործունեության շարունակականության ապահովումը, կրթական ներուժի զարգացումն ու Հայաստանի հետ կապերի ամրապնդումը։
Սփյուռքի Գլխավոր Հանձնակատարի Գրասենյակ
Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը: