Այսօր տեղի է ունեցել Եղեգնաձոր համայնքի նորընտիր ավագանու առաջին նիստը, որի ընթացքում համայնքի ղեկավար է ընտրվել «Հանրապետություն» կուսակցության ընտրական ցուցակը գլխավորող, համայնքի գործող համայնքապետ Դավիթ Հարությունյանը։
Քվեարկության արդյունքում Դավիթ Հարությունյանը ստացել է ավագանու 14 անդամի ձայնը, իսկ «Քաղաքացիական պայմանագիր» կուսակցության թեկնածու Հուսիկ Սահակյանը՝ 13 ձայն։
Մինչև արդյունքների հայտարարումը Սահակյանն իր աջակիցների հետ լքեց նիստերի դահլիճը, սակայն մինչև այդ սեղմեց Հարությունյանի ձեռքը։
Հիշեցնենք՝ Եղեգնաձոր համայնքի ընտրություններին 3 քաղաքական ուժ է մասնակցել․ «Նոր դարաշրջան», «Քաղաքացիական պայմանագիր» և «Հանրապետություն» կուսակցությունները։ Համայնքն ունի 24 հազար 419 ընտրող։
Գործող համայնքապետ Դավիթ Հարությունյանը 2012-ին ընտրվել է Եղեգնաձորի քաղաքապետ։ 2016-ի ընտրություններում Հարությունյանը Եղեգնաձորի համայնքապետի միակ թեկնածուն էր և վերընտրվել էր 2-րդ ժամկետով։
2021-ի համայնքների խոշորացումից հետո Եղեգնաձոր համայնքի կազմում ընդգրկվեցին նաև Գետափը, Գլաձորը, Մալիշկան և Վերնաշենը։ Դեկտեմբերի 5-ի ընտրություններին Հարությունյանը գլխավորում էր իր անունը կրող՝ «Դավիթ Հարությունյան» դաշինքը, որը կազմված էր «Բարգավաճ Հայաստան» և «Դեմոկրատական այլընտրանք» կուսակցություններից։ Հարությունյանը ԿԿՀ ներկայացրած հայտարարագրում որևէ կուսակցության անվանում չի նշել։
Այս տարի նա ընտրություններին մասնակցել է «Հանրապետություն» կուսակցության ընտրական ցուցակով։
ՔՊ-ի թեկնածուն Եղեգնաձորի ընտրություններում Արենի համայնքի ղեկավար Հուսիկ Սահակյանն էր (Արենին ու Եղեգիսը միավորվել են Եղեգնաձոր համայնքի հետ)։ Նա Արենին ղեկավարել է շուրջ 30 տարի՝ 1996-ից։ 2017-ին համայնքապետ է ընտրվել Հայաստանի հանրապետական կուսակցության, իսկ 2022-ին՝ ՔՊ-ի ցուցակով։
«Նոր դարաշրջան» կուսակցության ընտրական ցուցակն էլ գլխավորում է Մարտին Հարությունյանը։ Նա քրեական մասնագիտացում ունեցող փաստաբան է։ Այս տարվա ԱԺ ընտրություններում «Նոր դարաշրջան» կուսակցությունը մեկն էր այն քաղաքական ուժերից, որ մտել է «Ուժեղ Հայաստան» դաշինքի մեջ։ Համանուն «Ուժեղ Հայաստան», «Նոր դարաշրջան» և «Միավորված հայեր» կուսակցությունների դաշինքն էլ այժմ ամենամեծ ընդդիմադիր ուժն է խորհրդարանում։
Եվգենյա Հարությունյան