Թեև վարորդներին չի արգելվում օգտագործել էներգետիկ ըմպելիքներ, հոգնածությունը հաղթահարելու համար դրանց վրա հույս դնելը վտանգավոր է։ Կոֆեինն ու տաուրինը, իհարկե, կարող են կարճ ժամանակով բարձրացնել զգոնությունը և նվազեցնել քնկոտությունը, սակայն դրանք չեն վերացնում քնի պակասի հետևանքները, ինչպես նաև չեն վերականգնում ուշադրության կենտրոնացումն ու արձագանքման արագությունը՝ հասցնելով դրանք լավ հանգստացած մարդու մակարդակի։ Այս մասին «Գազետա»-ին տված հարցազրույցում զգուշացրել է հոգեբույժ, կախվածությունների բուժման մասնագետ, նարկոլոգ, «Դոկտոր Իսաեւի կլինիկայի» ղեկավար Ռուսլան Իսաեւը։
«Եթե վարորդը խիստ հոգնած է, էներգետիկ ըմպելիքը կարող է ստեղծել խաբուսիկ զգացողություն, թե նա դեռ ի վիճակի է անվտանգ վարել մեքենան։ Թեև կոֆեինը կարող է ժամանակավորապես բարելավել վարելուն առնչվող որոշ ցուցանիշներ, այն պետք է դիտարկել միայն որպես հոգնածության դեմ պայքարի լրացուցիչ միջոց, այլ ոչ թե որպես պատշաճ հանգստին փոխարինող տարբերակ», — բացատրել է բժիշկը։
«Ավելին, էներգետիկ ըմպելիքների մեծ քանակությամբ օգտագործումը կարող է հանգեցնել սրտխփոցի արագացման, դողի, նյարդայնության և գրգռվածության աճի։ Նման ռեակցիաները կարող են խաթարել ուշադրության կենտրոնացումը և մեքենա վարելը դարձնել վտանգավոր»։
Մի խոսքով, մեկ էներգետիկ ըմպելիքը ավտոմատ կերպով վարորդին չի դարձնում վտանգավոր, իսկ կոֆեինի չափավոր քանակությունը կարող է կարճ ժամանակով բարձրացնել զգոնությունը։ Սակայն, եթե վարորդը նկատում է, որ սկսում է նիրհել, կորցնում է կենտրոնացումը կամ դժվարանում է հետևել ճանապարհին, միակ պատասխանատու քայլը անվտանգ վայրում կանգ առնելն ու հանգստանալն է։