«Նմուշառվել են գրեթե բոլոր կաթնամթերք արտադրողները՝ «Աշտարակ կաթ», «Արզնի», «Երեմյան», «Մարիաննա», «Մարիլա», «Չանախ», «Անի», «Միլկին», «Բիոկաթ», «Բոնիլաթ» և «Իգիթ» արտադրատեսակները»,-ասուլիսում նշեց «Իրազեկ և պաշտպանված սպառող» ՀԿ-ի նախագահ Բաբկեն Պիպոյանը:
«Իրազեկ և պաշտպանված սպառող» ՀԿ-ն հայտարարած դրամահավաքի նախաձեռնության շրջանակում լաբորատոր փորձաքննության է հանձնել մի քանի ընկերության արտադրած կաթնամթերքը: Լաբորատոր հետազոտության տվյալները ցույց են տվել, որ առկա են բազմաթիվ շեղումներ։
Բաբկեն Պիպոյանը նշեց, որ ընտրել են սննդի բնագավառում միջազգային հավատարմագրում ունեցող 3 լաբորատորիա և այնպիսի սուպերմարկետներ, որոնց սառնարաններն ապահովում են համապատասխան ջերմաստիճան:
«Ըստ էության՝ «Իգիթը» չէինք էլ նմուշառի, պարզապես տարվա ընթացքում շատ էր խոսվում «Իգիթում» առկա խախտումների մասին, նաև կասեցվել էր: Իսկ Սննդամթերքի անվտանգության տեսչական մարմնի (ՍԱՏՄ) հաղորդագրությունը մի փոքր տարօրինակ էր, քանի որ նախորդ տարիներին շատ ավելի մեծ տեսականի էր նմուշառվում: Իսկ այս տարի միայն մեկ տեսականու մասին էր խոսվում, և մեզ հետաքրքիր էր՝ իրե՞նք են քիչ ստուգել ու քիչ խախտումներ հայտնաբերել, թե՞ պատկերն այլ էր…
«Իգիթի» արտադրած 200 գրամանոց չեչիլ պանրի մեջ մենք հայտնաբերել ենք աղիքային ցուպիկի խմբի մանրէներ: Սննդամթերքի անվտանգության տեսչական մարմինն ինքն էլ հայտարարեց, որ «Իգիթում» հայտնաբերել է խախտում, և պանրի որոշ արտադրատեսակներ կասեցվել են»,- նշեց Բաբկեն Պիպոյանը:
«Կաթերից չենք ստուգել միայն «Արզնի» կաթի արտադրանքը, որը խանութում բացակայել է, և այդ ժամանակահատվածը համընկել է այն շրջանի հետ, երբ «Արզնին» կասեցված է եղել: Մնացած բոլոր ընկերությունների արտադրանքը նմուշառել ենք: «Աշտարակ կաթում» ունենք խախտում՝ աղիքային ցուպիկ ցուցանիշով, մնացած կաթերում բարեբախտաբար վիճակը լավ էր: Ընդգծեմ՝ խոսում ենք միայն այն ցուցանիշների մասին, որոնք ստուգել ենք: Ստուգել ենք նաև նշված բոլոր ընկերությունների, բացի «Իգիթից»: «Երեմյան» ընկերության 25% յուղայնության թթվասերում, «Արզնի կաթի» 20% յուղայնությամբ և «Բոնիլաթի» 17% յուղայնությամբ թթվասերներում հայտնաբերել ենք աղիքային ցուպիկի խմբի մանրէներ: Բնականաբար, 10 արտադրողից 3-ի մոտ խախտումը արդեն իսկ մտահոգիչ չէ, չնայած սրանք համեմատաբար ուրախ նոտաներն էին»,- մանրամասներ ներկայացրեց «Իրազեկ և պաշտպանված սպառող» ՀԿ-ի նախագահը:
Բաբկեն Պիպոյանի խոսքով. «Կաթնաշոռերի շուկայում ունենք լրջագույն խնդիր, խախտումներ են հայտնաբերվել ոչ միայն աղիքային ցուպիկի, այլև խմորասնկերի, բորբոսասնկերի ցուցանիշի մասով և կաթնաթթվային մանրէների մասով: Կաթնաշոռերում շեղումներ հայտնաբերվել են «Թամարա-Անի» կաթնաշոռում, «Մարիաննայի», «Աշտարակ կաթի», «Երեմյանի», «Միլկինի», «Բոնիլաթի», «Բիոկաթի», «Չանախի» և «Արզնիի» կաթնաշոռերում: Ընդ որում՝ խմորասնկերի, բորբոսասնկերի ցուցանիշով շեղումներ են հայտնաբերվել «Բոնիլաթում», «Թամարա-Անիում», «Չանախում» և «Մարիլայում», «Արզնիում» և «Բիոկաթում»: Կաթնաթթվային մանրէները պակաս են եղել «Մարիաննայում», «Չանախում», «Մարիլայում» և «Միլկինում»: Կաթնաշոռի մասով կան ընկերություններ, որոնք միաժամանակ 3 ցուցանիշով ունեն խախտում, որոշները՝ 2 ցուցանիշով: Կան ընկերություններ, որոնց պարագայում մի լաբորատորիան տվել է, որ ունեն խախտում, մյուսը բացառել է խախտումը»:
«Իրազեկ և պաշտպանված սպառող» ՀԿ-ի նախագահը տեղեկացրեց, որ բոլոր տվյալները փոխանցելու են ՍԱՏՄ-ին, ներկայացնելու են նաև մեթոդաբանությունը, թե ինչպես պետք է իրականացվի վերահսկողությունը՝ խախտումներ հայտնաբերելու համար: Նա նաև տեղեկացրեց, որ առաջիկայում ուսումնասիրելու են այլ սննդամթերքներ ևս:
Գոհար ՀԱԿՈԲՅԱՆ
Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը: