«Մենք դեմ չենք COP17-ի իրականացմանը ՀՀ-ում, քանի որ սա միջազգային հեղինակավոր համաժողով է։ Բայց մենք դեմ ենք, որ այս տեսակի միջոցառումները վերածվեն պետական գումարների անթափանցիկ ծախսման կամ մսխման ՀՀ-ում»,-ԱԺ արտահերթ նիստի ժամանակ հայտարարեց «Ուժեղ Հայաստան» խմբակցության պատգամավոր Լենա Մաթևոսյանը։
ԱԺ-ն քննարկեց և վավերացրեց «Հայաստանի Հանրապետության կառավարության և Կենսաբանական բազմազանության մասին կոնվենցիայի քարտուղարության միջև կողմերի համաժողովի տասնյոթերորդ հանդիպման, որպես Կարթագենյան արձանագրության կողմերի հանդիպում հանդես եկող կողմերի համաժողովի քսաներորդ հանդիպման և որպես Նագոյայի արձանագրության կողմերի հանդիպում հանդես եկող կողմերի համաժողովի վեցերորդ հանդիպման անցկացման վերաբերյալ» համաձայնագիրը։
Խոսելով COP 17-ի իրականացման համար կնքված պայմանագրերի մասին՝ պատգամավորն ասաց․ «Գովազդային արշավի իրականացման համար պայմանագրերից առաջինի համար 54 միլիոն դրամ է նախատեսված, երկրորդ պայմանագրի համար՝ 208 միլիոն դրամ, երրորդի համար՝ 189 միլիոն դրամ։ Մոտ 452 միլիոն դրամ ծախսվում է COP17-ի գովազդային արշավի համար։ Շրջակա միջավայրի նախարարությունը փետրվարի 23-ին պայմանագիր է կնքում ու տալիս 90 տոկոս կանխավճար ոչ մի ծառայություն չիրականացրած կազմակերպությանը գովազդային արշավ իրականացնելու համար։ Մարդ ես, կարող է՝ ինչ-որ բան էր պատահում, ու գովազդային արշավը չէր իրականացվում։ Այն կազմակերպությանը, որը ձախողել էր Սնուփ Դոգի համերգը, 90 տոկոս կանխավճար են տալիս»։
ԱԺ արտահերթ նիստն ամբողջությամբ՝ տեսանյութում
Տաթև ՀԱՐՈՒԹՅՈՒՆՅԱՆ
Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը: