«Ռուսական երկաթուղիներ» ԲԲԸ–ի գլխավոր տնօրեն, կառավարման խորհրդի նախագահ Օլեգ Բելոզյորովը հաջորդ շաբաթ կայցելի Հայաստան։ ՀՀ վարչապետ Նիկոլ Փաշինյանն այդ մասին հայտնեց կառավարության նիստից հետո` պատասխանելով լրագրողների հարցերին։
«ԵԱՏՄ նախորդ նիստի ժամանակ պայմանավորվածություն ունեցանք։ Մենք կունենանք աշխատանքային քննարկում և որոշ հետևություններ կանենք այդ աշխատանքային քննարկման արդյունքներում»,– ասաց Փաշինյանը։
ՀՀ վարչապետը նշեց, որ Երասխի հատվածների վերականգման հարցում հետաքրքրություն ունի նաև ղազախական ընկերությունը, սակայն որոշում չկա, և ամեն ինչ կլինի քննարկումների արդյունքում։
Հիշեցնենք` 2008թ. փետրվարին Հայաստանի երկաթուղային ենթակառուցվածքը կոնցեսիոն կառավարման հանձնվեց ՀԿԵ-ին 30 տարով՝ ևս 10 տարով երկարաձգելու իրավունքով:
2025թ–ի դեկտեմբերի 18-ի ճեպազրույցի ժամանակ ՀՀ վարչապետ Նիկոլ Փաշինյանը հայտարարեց, որ դիմել է Ռուսաստանին երկաթուղու՝ դեպի Ադրբեջան և Թուրքիա մի քանի հատվածների շտապ վերականգնման համար։ Դեկտեմբերի 22-ին Սանկտ Պետերբուրգում նա այդ թեման արծարծեց նաև Պուտինի հետ հանդիպման ժամանակ։ Դրանից օրեր անց լրագրողների հետ զրույցում Փաշինյանը հայտարարեց, որ ՀՀ կառավարությունը պատրաստ է ռուսական կոնցեսիոն կառավարումից հետ վերցնել երկաթուղային հատվածները և իր միջոցներով վերանորոգել։
Փետրվարին Փաշինյանն առաջարկեց Հայաստանի երկաթուղիների կոնցեսիոն կառավարումը վաճառել Երևանի և Մոսկվայի բարեկամ երկրի։ Ավելի ուշ նա չբացառեց, որ երկաթուղիների կառավարման հարցը կարող է հասնել մինչև արբիտրաժային դատարա