ՀՀ ՏԿԵ նախարարի տեղակալ Առնակ Ավետիսյանի գլխավորությամբ տեղի է ունեցել հանդիպում-քննարկում ԵՄ չափանիշներին համապատասխան աղբահանության և կոշտ կենցաղային թափոնների կառավարման ինտեգրված համակարգի ներդրման նպատակով մեկնարկած «Տարածաշրջանային կոշտ թափոնների կառավարում» ծրագրի տեխնիկատնտեսական ուսումնասիրության գործընթացի վերաբերյալ։
Ծրագրի շրջանակներում նախատեսվում է հանրապետության տարածքում կառուցել առնվազն ևս 3 սանիտարական աղբավայր, փոխաբեռնման կայաններ, վերամշակման գործարաններ, ապահովել ամբողջական լոգիստիկան, ինչպես նաև փակել գործող աղբավայրերը։
ՎԶԵԲ-ի աջակցությամբ ընտրված միջազգային խորհրդատուների, ինչպես նաև հունական և ավստրիական խորհրդատուների հետ համատեղ իրականացվել են այցելություններ տարբեր համայնքներ՝ նախատեսվող աղբավայրերի, վերամշակման գործարանների և փոխաբեռնման կայանների հնարավոր տեղադիրքերի ընտրության, ինչպես նաև մարզերում ու համայնքներում ծրագրի իրականացման հետ կապված հետագա գործընթացների քննարկման նպատակով։
Նախարարի տեղակալը հանդիպման ընթացքում շեշտել է, որ ծրագիրն ունի քաղաքական ամուր աջակցություն՝ վերահաստատելով պատրաստակամությունը ծրագրի աշխատանքների համակարգման գործում։