Իշխանությունների հետ որևէ պայմանավորվածություն չի եղել և չի լինելու, Հայաստանի և հայության վերաբերյալ մեր պատկերացումները և իշխանությունների պատկերացումները արմատապես տարբերվում են։ Այդ մասին հոկտեմբերի 6-ին խորհրդարանի նիստի ժամանակ հայտարարել է «Հայաստան» դաշինքի խմբակցության քարտուղար Արթուր Խաչատրյանը։
Նա հիշեցրել է, որ ԵԽԽՎ դիտորդների զեկույցում նշված է, թե ինչպես են Հայաստանում անցկացվել ընտրությունները և ինչպես են իշխանությունները չարաշահել վարչական ռեսուրսը։
Խաչատրյանը հավելել է, որ այնտեղ եղել են նաև դրվագներ Հայաստանում ժողովրդավարության վիճակի և այն մասին, թե ինչպես են իշխանությունները ճնշում իրենց քաղաքական ընդդիմախոսներին։ Ակնարկները բավականին հստակ էին։
«Այսօր ընդդիմադիր երեք ուժերի ղեկավարները գտնվում են ճաղերի հետևում։ Իսկ մեկի մոտ գողացել են արդյունքները։
Ինչո՞ւ են այս մարդիկ գտնվում ճաղերի հետևում։ Ինչո՞ւ է նախագահ Ռոբերտ Քոչարյանն արդեն չորրորդ անգամ գտնվում կալանքի տակ։ Որովհետև այս մարդիկ գործարքի չեն գնացել իշխանությունների հետ։ Արդյունքում նախագահ Քոչարյանը գտնվում է ճաղերի հետևում։ Նույն պատճառով մեր գործընկեր Արթուր Սարգսյանը գտնվում է տնային կալանքի տակ, քրեական հետապնդում է իրականացվում ՀՅԴ Գերագույն մարմնի անդամ Իգոր Սարգսյանի նկատմամբ»,- նշել է «Հայաստան» դաշինքի խմբակցության քարտուղարը։