Ռումինիայի Կազմակերպված հանցավորության և ահաբեկչության դեմ պայքարի վարչության (DIICOT) աշխատակիցները՝ Ոստիկանության գլխավոր տեսչության քրեական հետաքննության վարչության հետ համատեղ, ձերբակալել են նախագահի նախկին թեկնածու Կալին Ջորջեսկուին։ Խուզարկություն է իրականացվել Մոգոշոայա քաղաքում նրա տանը։
Ջորջեսկուին ձերբակալել են մարզասրահ գնալիս և վերադարձրել տուն, որպեսզի խուզարկությունն իրականացվի նրա ներկայությամբ։
Գործողությունն իրականացվում է 1,1 միլիոն եվրոյի վնաս պատճառած ենթադրյալ խարդախության գործով հետաքննության շրջանակում։ DIICOT-ը քննում է հանցավոր խմբավորում ստեղծելու և առանձնապես ծանր հետևանքներ առաջացրած խարդախության մեղադրանքները։ Խուզարկություններ են անցկացվում հինգ հասցեում՝ Մոգոշոայայում, Չիոլպանիում, Բուֆտեայում և Բուխարեստում։
Ըստ գերատեսչության տվյալների՝ 2021 թվականի սեպտեմբերին Ռումինիայի երկու քաղաքացի (64 և 47 տարեկան) և Իտալիայի մեկ քաղաքացի (56 տարեկան) ստեղծել են կազմակերպված հանցավոր խումբ։ Խումբը գործել է 64-ամյա ռումինացու ղեկավարությամբ՝ հիմնականում Ռումինիայում, ինչպես նաև Մեծ Բրիտանիայում՝ «անօրինական ֆինանսական շահույթ ստանալու նպատակով»։ «Կազմակերպիչը հանցավոր սխեմայի մյուս երկու մասնակիցներին կոնկրետ դերեր է բաշխել՝ ներկայացնելով նրանց որպես հաջողակ գործարարներ և օտարերկրյա ընկերությունների ղեկավարներ, ովքեր իբրև թե տնօրինում էին զգալի միջոցներ՝ Ռումինիայում իրենց բիզնեսն ընդլայնել ցանկացող տուժողներին վարկեր տրամադրելու համար՝ ֆինանսական երաշխիքների տրամադրման պայմանով», – հայտնել է գերատեսչությունը։