Սեպտեմբերի 14-ին Ժնևում՝ Բռնի անհետացումների հարցերով կոմիտեի 31-րդ նստաշրջանի շրջանակներում, տեղի է ունեցել Հայաստանի հետ երկխոսությունը։
Հայաստանի պատվիրակությունը գլխավորել է ՀՀ ԱԳՄԱ նախարարի տեղակալ Ռոբերտ Աբիսողոմոնյանը։ Պատվիրակության կազմում երկխոսությանը մասնակցել են ՀՀ ԱԳՄԱ, Արդարադատության, Ներքին գործերի, Առողջապահության նախարարությունների, Ազգային անվտանգության ծառայության, Քննչական կոմիտեի, Միջազգային իրավական հարցերով ՀՀ ներկայացուցչի գրասենյակի և ԱՆ դատաբժշկական գիտագործնական կենտրոնի ներկայացուցիչները։
Հանդիպման ընթացքում ՀՀ ԱԳՄԱ նախարարի տեղակալ Ռոբերտ Աբիսողոմոնյանը հանդես է եկել բացման խոսքով՝ անդրադառնալով Հայաստանի հանձնառությունների իրականացման գործում գրանցված առաջընթացին, ընդգծելով առկա մարտահրավերների վերհանման և հասցեագրման, ինչպես նաև Կոնվենցիայի լիարժեք ու արդյունավետ իրագործման կարևորությունը։
Ներկաների ուշադրությանն է ներկայացվել Կոմիտեի դիտարկումների հասցեագրման հարցում Հայաստանի կողմից գործադրված ջանքերը, այդ թվում՝ իրավական, ինստիտուցիոնալ և գործնական քայլերը, որոնք միտված են բռնի անհետացածների և իրենց ընտանիքների համար մարդու հիմնարար իրավունքի պաշտպանության, օրենքի գերակայության և արդարադատության ապահովմանը։
Վերահաստատվել է ՀՀ հանձնառությունը՝ ուղղված անհայտ կորածների և բռնի անհետացածների հարցերի հասցեագրման գործում միջազգային գործընկերների և մարմինների հետ համագործակցությանը, կարողությունների ամրապնդմանը և ամուր իրավական դաշտի ապահովմանը։
Անդրադարձ է կատարվել նաև Հայաստանի և Ադրբեջանի միջև նախաստորագրված խաղաղության պայմանագրին և դրանում անհայտ կորած անձանց և բռնի անհետացումների դեպքերի հասցեագրման վերաբերյալ առկա դրույթին՝ ընդգծելով տարածաշրջանում հաստատված խաղաղության ինստիտուցիոնալացման կարևորությունը։
Հայաստանի պատվիրակության ներկայացուցիչները հանդես են եկել ելույթներով` պատասխանելով Հայաստանի հարցով զեկուցողների և Կոմիտեի մյուս անդամների հարցադրումներին:
Ծանոթագրություն․ Բռնի անհետացումների հարցերով կոմիտեն անկախ փորձագետներից կազմված մարմին է, որն իրականացնում է անդամ պետություններում Բռնի անհետացումներից մարդկանց պաշտպանության հարցերով կոնվենցիայի դրույթների իրականացման մոնիտորինգ։
Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը: