Քաղաքականություն
10.07.2026 | 22:17
Ռուսաստանի կառավարությունում խոստովանել են, որ Ուկրաինայի կողմից ռուսական նավթավերամշակման գործարանների վրա հարվածները հանգեցրել են վառելիքի պակասի։ Այս մասին հայտարարել է ՌԴ փոխվարչապետ Ալեքսանդր Նովակը մամուլի ասուլիսում, գրում է DW-ն։
«Մենք պետք է ընդունենք, որ կան խնդիրներ և դեֆիցիտ, այդ պատճառով մենք տեսնում ենք հերթեր»,- ասել է նա։
Ռուսաստանի փոխվարչապետն ասել է՝ առաջացած դեֆիցիտը «հասկանալի պատճառներ» ունի, մասնավորապես, նավթավերամշակման գործարանները «մասամբ շարքից դուրս են եկել անօդաչու թռչող սարքերի ներխուժումների պատճառով»։
The Insider-ը նշում է, որ դաշնային իշխանություններն ավելի վաղ խուսափում էին ընդունել, որ Ռուսաստանում վառելիքի պակասը պայմանավորված է ուկրաինական անօդաչու թռչող սարքերի կողմից նավթավերամշակման գործարանների վրա հարվածներով։
Հուլիսի 8-ին Ռուսաստանի նախագահ Վլադիմիր Պուտինի և կառավարության անդամների հանդիպման ժամանակ Նովակը հայտարարել էր միայն «բենզինի և դիզելային վառելիքի արտադրության ծավալի մասնակի կրճատման» մասին՝ Ուկրաինայի զինված ուժերի հարձակումների պատճառով։
Վառելիքային ճգնաժամը լուծելու փորձի շրջանակում Ռուսաստանի կառավարությունը մի շարք միջոցառումներ է ձեռնարկել, այդ թվում՝ բենզինի և դիզելային վառելիքի արտահանման արգելքը։
Financial Times-ի գնահատականներով՝ Ռուսաստանում վառելիքի պակասն անմիջականորեն ազդում է մոտավորապես 50 միլիոն ռուսաստանցիների կամ բնակչության 35 տոկոսի վրա։
Թարգմանությունը՝ Էմմա Չոբանյանի