2026 թվականին Չինաստանում մարդանման ռոբոտների արտադրության ծավալը կարող է գերազանցել 100 հազար միավորը։ Այս մասին հայտարարել է ՉԺՀ արդյունաբերության և տեղեկատվական տեխնոլոգիաների նախարարության գիտության և տեխնոլոգիաների վարչության փոխտնօրեն Գան Սյաոբինը։
Նա այս հայտարարությունն արել է 2026 թվականի Արհեստական բանականության համաշխարհային համաժողովի (WAIC) նախօրեին կայացած մամուլի ասուլիսի ընթացքում։
Գան Սյաոբինի խոսքով՝ արհեստական բանականության վրա հիմնված կիրառությունների և AI էկոհամակարգերի զարգացումը խթանում է արագ աճող ռոբոտաշինության արդյունաբերությունը՝ հզոր ազդակ հաղորդելով երկրի տնտեսական և տեխնոլոգիական զարգացմանը։
Նրա ներկայացրած տվյալներով՝ Չինաստանի խոշոր արդյունաբերական ձեռնարկություններում արհեստական բանականության կիրառման մակարդակն արդեն գերազանցել է 30%-ը։
WAIC 2026 համաժողովը կանցկացվի հուլիսի 17-20-ը՝ Շանհայում, «AI-ի գործընկերություն՝ հանուն լուսավոր ապագայի» կարգախոսով։
Համաժողովի ծրագիրը կներառի վեց հիմնական թեմատիկ բաժին։ Մասնակցության համար արդեն գրանցվել է ավելի քան 1100 ընկերություն։
Կազմակերպիչների գնահատմամբ՝ միջոցառման ընթացքում կներկայացվի ավելի քան 3000 ցուցանմուշ, որոնցից ավելի քան 300-ը համաշխարհային պրեմիերա կդառնան։
Տեխնոլոգիական հրապարակումներն իրականացվում են Իդրամի աջակցությամբ։