«Կապանցիները դառը կյանքով ապրած են, պատերազմ տեսած մարդ ենք, մի քանի տարի ապաստարաններից ու սահմաններից տուն չէինք գալիս: Մեզ խաղաղություն է պետք»,- այսօր Կապանում «Միասնական թեւեր» կուսակցության անդամների հետ հանդիպման ժամանակ կուսակցության առաջնորդ, վարչապետի թեկնածու Արման Թաթոյանին ասաց Կապանի մի բնակիչ:
Թաթոյանն էլ ասաց, որ Հայաստանում չկա այդպիսի մի հարց, որ ամբողջ հայությամբ չկարողանանք լուծել. «Մեր կարգախոսներից է սխալներ, ուղղում, վերածնունդ: Ամեն ինչ լավ է լինելու, վախերին պետք չէ տուրք տալ»:
Մի քաղաքացի էլ առաջարկեց Թաթոյանին, որ հենց ընտրվի վարչապետ, անպայման լուծի դատական համակարգի խնդիրները, հաստատի արդարադատություն ու օրենքով պաշտոնից հեռացվեն ու որակազրկվեն այն դատավորները, որոնք արդարադատություն չեն իրականացրել:
Թաթոյանն էլ հաստատեց՝ չպետք է լինեն դատավորներ, որոնք իշխանության հովանավորության տակ են, դատավորն ու դատախազը պետք է պաշտպանված լինեն. «Իմ վարչապետության ժամանակ երբեք չի լինելու, որ միջամտես դատական գործերին… Այսօր ի՞նչ ունենք՝ դատավորներ, որոնք իշխանության ասածներն են անում, այդքան կալանքները հենց իշխանության սիրած դատավորներն են անում: Նախկինում որ կար հովանավորությունը առանձին դատավորների նկատմամբ, այդ նույն ձեւ հիմա շարունակվում է: Այս հարցում դրական փոփոխություն չունենք, ավելի վատ է: Այդպիսի երեւույթ կա՝ մացոյականություն է կոչվում, եղել է այն ժամանակ, հիմա կա նեոմացոյականություն, որը ավելի նոր ու վատ ձեւով է իշխանություններին ծառայում, ավելի սրտանց է խախտումները անում, որ նախորդի համար պատասխանատվության չենթարկվի» :
«Միասնության թեւերի» պատգամավորի թեկնածու, ՊԵԿ նախկին նախագահ Դավիթ Անանյանն էլ շարունակեց Թաթոյանին. «Մի մեծ եղբայր ունեմ, հարցնում է՝ դու Նիկոլին աղջիկ կտայի՞ր, հիմա Նիկոլն եկել է ձեր տուն՝ աղջկադ ձեռքն է խնդրում, կտայի՞ր, ասում է ՝ չէ, արա բա որ չէ, այս պետությունը ո՞նց ես տվել»:
Արփինե ՍԻՄՈՆՅԱՆ
Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը: