«ԼՂ ժողովուրդը ինքնորոշման իրավունքի շնորհիվ խաղաղ ճանապարհով ուզում էր դուրս գալ Ադրբեջանի կազմից, և մենք ստացանք Սումգայիթ»․ Ծիծեռնակաբերդի բարձունքում տեղադրված Սումգայիթում 1988-ի փետրվարի 26-29-ին հայերի ցեղասպանության զոհերի հիշատակի խաչքարի մոտ անցկացված հավաքի ընթացքում՝ նվիրված Սումգայիթում սպանված հայերի հիշատակին, ասաց Հայաստանի դեմոկրատական կուսակցության նախագահ Արամ Գասպարի Սարգսյանը։
Ըստ նրա՝ մենք պետք է հասկանայինք, որ գործ ունեինք ոչ թե բարեկամի, այլ թշնամու հետ, որը մինչև այսօր իրականացնում է ցեղասպանություն․ «Նույնը կատարվեց Կիրովաբադում, նույնը եղավ Մարաղայում, Բաքվում։ Հետո շարունակվեց արդեն պատերազմի գործողություններով և նաև Արցախի հայաթափմամբ։ Այստեղ է, որ ՀՀ ղեկավար կոչվածները պարտավոր էին միջոցներ ձեռնարկել, որ թույլ չտային՝ հայաթափվեր Արցախը»։
Արամ Սարգսյանն ասաց՝ չէին սպասում, որ ՀՀ իշխանություններն այսօր կլինեն այստեղ և գոնե մի ծաղկեպսակ կբերեն և հիշատակը կհարգեն․ «Միակ բանը, որ արել են, հայտարարություն է եղել ԱԳՆ կողմից։ Սա իրենց համար չակերտավոր հերոսական քայլ է։ Բայց մեր գործողությունները լինելու են հետևողական և շարունակական»։
Սումգայիթում սպանված հայերի հիշատակին նվիրված հավաքն ամբողջությամբ՝ տեսանյութում
Տաթև ՀԱՐՈՒԹՅՈՒՆՅԱՆ
Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը: