ՀՀ Ազգային ժողովը չորեքշաբթի կայացած նիստում առաջին ընթերցմամբ ընդունել է «Առողջության համընդհանուր ապահովագրության մասին» և «Դեղերի մասին» ՀՀ օրենքներում փոփոխություններ կատարելու մասին նախագծերը։
ՀՀ առողջապահության նախարար Անահիտ Ավանեսյանը հայտարարել է, որ 2027 թվականի հունվարի 1-ից առողջության համընդհանուր ապահովագրության համակարգին կմիանա ավելի քան 400 հազար քաղաքացի։ Հիմնական փոփոխություններից մեկը կլինի աշխատող քաղաքացիների համար ընտանիքի անդամներին լրացուցիչ ապահովագրելու հնարավորությունը՝ կախված աշխատավարձի չափից։
Ո՞վ և որքա՞ն է վճարելու ապահովագրության համար
Ավանեսյանի խոսքով՝ 2027 թվականի հունվարի 1-ից առողջության համընդհանուր ապահովագրության համակարգում կընդգրկվի մինչև 200 հազար դրամ աշխատավարձ ստացող շուրջ 340–350 հազար քաղաքացի։
Նրանց ամսական ապահովագրավճարը կկազմի 10 800 դրամ, որից 4400 դրամը կվճարի պետությունը, 4400 դրամը՝ գործատուն, իսկ 2000 դրամը՝ աշխատողը։
Ավանեսյանի խոսքով՝ նման մեխանիզմը հնարավորություն կտա ֆինանսական բեռը բաշխել բոլոր կողմերի միջև։
Ինչպե՞ս հնարավոր կլինի ապահովագրել ընտանիքի անդամներին
2027 թվականից 200–500 հազար դրամ աշխատավարձ ստացող քաղաքացիները կկարողանան առողջության համընդհանուր ապահովագրության համակարգում ներառել ընտանիքի մեկ անդամի, իսկ 500 հազար դրամից ավելի աշխատավարձ ստացողները՝ մինչև երկու անձի։
Խոսքը, մասնավորապես, չաշխատող ամուսինների և ուսանող երեխաների մասին է։
Դրա համար անհրաժեշտ կլինի դիմել Ապահովագրական հիմնադրամ և ինքնուրույն վճարել ընտանիքի համապատասխան անդամի ամսական ապահովագրավճարը։
Ընտանիքի երկու անդամի սահմանափակումը պայմանավորված է ապահովագրական հիմնադրամի ֆինանսական կայունությունն ապահովելու անհրաժեշտությամբ։
Հետագայում սահմանափակումները կարող են վերանայվել՝ հաշվի առնելով նոր մեխանիզմի կիրառման առաջին տարվա արդյունքները։
Ինչպե՞ս են ապահովագրվելու տաքսու վարորդները
Օրենսդրական փոփոխություններով նախատեսվում է նաև առանձին մեխանիզմ՝ էլեկտրոնային հարթակների միջոցով տաքսի ծառայություններ մատուցող քաղաքացիներին ապահովագրական համակարգում ընդգրկելու համար։
Այն նախատեսված է նախևառաջ այն վարորդների համար, որոնց եկամտի հիմնական աղբյուրը տաքսի ծառայությունների մատուցումն է։
Առաջարկվող պայմաններով՝ վարորդը պետք է ունենա էլեկտրոնային հարթակի միջոցով աշխատանքի առնվազն երկու տարվա պատմություն և սահմանված նվազագույն աշխատավարձի շեմին հասնող շրջանառություն։
Ընդ որում, վարորդների համար չի գործի 200 հազար դրամի աշխատավարձային շեմը, քանի որ նրանց գործունեությունն ունի այլ տնտեսական մոդել։
Ամսական ապահովագրավճարը կկազմի 10 800 դրամ՝ անկախ սահմանված նվազագույն շեմը գերազանցող վաստակի չափից։
Ավանեսյանը տեղեկացրել է, որ ապահովագրական հիմնադրամի հետ փոխգործակցությունը կկազմակերպվի էլեկտրոնային հարթակների միջոցով, որոնք վարորդների փոխարեն կփոխանցեն ապահովագրավճարները։
Ապահովագրավճարների վերադարձը՝ մի քանի վայրում աշխատելու դեպքում
Նախարարը պարզաբանել է նաև միաժամանակ մի քանի վայրում աշխատող քաղաքացիների ապահովագրավճարների վճարման կարգը։
Նրա խոսքով՝ եթե ապահովագրավճարներն ի սկզբանե պահվում են մի քանի աղբյուրներից, ավել վճարված գումարները ենթակա են վերադարձման։
Արդյունքում յուրաքանչյուր քաղաքացու համար պետք է պահպանվի միայն մեկ ապահովագրավճար։
«Մարդը մեկ անգամ դիմում կներկայացնի, որից հետո գործընթացը պետք է իրականացվի ավտոմատ կերպով», – հայտնել է Ավանեսյանը։
Ինչո՞ւ է ավելացել բժշկական ապահովագրության մասնակիցների թիվը
Ավանեսյանը տեղեկացրել է նաև, որ 2026 թվականի ընթացքում շուրջ 160 հազար քաղաքացու աշխատավարձը գերազանցել է 200 հազար դրամի շեմը, ինչի արդյունքում նրանք սկսել են օգտվել առողջության համընդհանուր ապահովագրության համակարգից։
Նրա խոսքով՝ դա պայմանավորված է աշխատավարձերի բարձրացմամբ և պահանջել է բյուջետային լրացուցիչ հատկացումներ, որոնք կառավարությունը հաստատել է։
Հայաստանում պարտադիր առողջության ապահովագրության համակարգի մասին
Հայաստանում պարտադիր բժշկական ապահովագրության համակարգը ներդրվում է 2026 թվականի հունվարի 1-ից՝ երեք փուլով՝ 2026–2028 թվականների ընթացքում։
2026 թվականից համակարգում ընդգրկվել է երկու խումբ։ Առաջին խմբում ներառվել են 200 հազարից մինչև 500 հազար դրամ աշխատավարձ ստացող քաղաքացիները, իսկ երկրորդում՝ մինչև 18 տարեկան անչափահասները, 18–65 տարեկան հաշմանդամություն ունեցող անձինք (I, II և III խմբերի), 65 տարեկան և բարձր տարիքի քաղաքացիները, ինչպես նաև 28 և ավելի միավոր ունեցող սոցիալապես անապահով ընտանիքները։
Երկրորդ խմբի ապահովագրության ծախսերի 100%-ը հոգում է պետությունը։
Երկրորդ փուլում՝ 2027 թվականից, համակարգում կընդգրկվեն մինչև 200 հազար դրամ աշխատավարձ ստացող անձինք, իսկ 2028 թվականից՝ մյուս խմբերը, այդ թվում՝ գյուղատնտեսության ոլորտում զբաղվածները և նրանց ընտանիքների անդամները։
Բժշկական ապահովագրության փաթեթի հաշվարկային արժեքը կազմում է տարեկան 129,6 հազար դրամ՝ ամսական վճարման հնարավորությամբ։
Ապահովագրական փաթեթում ներառված են առավել պահանջված բժշկական ծառայությունները, այդ թվում՝ ամբուլատոր սպասարկումը, ընտանեկան բժշկի այցելությունները, նեղ մասնագետների խորհրդատվությունները, ինչպես նաև լաբորատոր հետազոտությունները՝ տարեկան սահմանված ծավալով։
Ծառայությունների ցանկը փուլ առ փուլ կընդլայնվի և կհստակեցվի՝ ներառելով առանձին վիրահատական միջամտություններ, մասնավորապես՝ ակնաբուժական (կատարակտի), սիրտ-անոթային և այլ միջամտություններ։