ԱՄՆ-ն և Իրանը առաջիկայում կատարա-պակիստանյան նոր նախաձեռնության շրջանակում կարող են նախնական համաձայնության հասնել Թեհրանի միջուկային ծրագրի վերաբերյալ։ Ասյ մասին հայտնում է Al Arabiya հեռուստաալիքը՝ հղում անելով սեփական աղբյուրներին։
«Կատարա-պակիստանյան նոր առաջարկը վերսկսում է Վաշինգտոնի և Թեհրանի միջև լուրջ բանակցությունների գործընթացը։ ԱՄՆ-ն համաձայնել է Իրանի տարածքում մինչև 3.67% ուրանի հարստացմանը, և Թեհրանն ընդունել է այդ պայմանը», – հայտնել է հեռուստաալիքը։
Աղբյուրների տվյալներով՝ կողմերը քննարկում են իրանական ուրանի հարստացման մակարդակի նվազեցման վերաբերյալ նախնական համաձայնության հասնելու հնարավորությունը։ Միևնույն ժամանակ Վաշինգտոնը պահանջում է նվազեցնել 60%-ի հասցված ուրանի հարստացման մակարդակը։
Հեռուստաալիքի աղբյուրները նաև հայտնել են, որ քննարկվում է երրորդ երկրի ներգրավման հնարավորությունը իրանական ուրանի հարստացման մակարդակի նվազեցմանը նպաստելու համար։ Բացի այդ, մշակվում են Իրան ՄԱԳԱՏԷ-ի տեսուչների վերադարձի պայմանները, սակայն նրանց լիազորությունների շրջանակը դեռ որոշված չէ։
Համաձայնության հասնելու դեպքում ԱՄՆ-ն կարող է 6-9 մլրդ դոլարի չափով ապասառեցնել իրանական ակտիվները։
Նախատեսվում է քննարկել նաև Հորմուզի նեղուցի անհապաղ բացման և Իրանի ծովային շրջափակման չեղարկման հետ կապված հարցեր։
Տարածաշրջանում զինված հակամարտությունը սկսվել է փետրվարի 28-ին, երբ ԱՄՆ-ն և Իսրայելը հարվածներ հասցրեցին իրանական օբյեկտներին: Թեհրանը պատասխանեց իր կողմից հարվածներով: Հունիսի կեսերին Իրանը և ԱՄՆ-ն մարտական գործողությունների դադարեցման մասին հուշագիր ստորագրեցին, սակայն հետագայում կողմերը կրկին հարվածներ փոխանակեցին: Հակամարտությունը մինչ օրս մնում է չկարգավորված: Շարունակվող լարվածության ֆոնին Հորմուզի նեղուցով նավագնացությունը գրեթե դադարել է: