«Ժողովուրդ» օրաթերթը գրում է. ««Ժողովուրդ» օրաթերթը շարունակում է հանրությանը ներկայացնել իշխանական և ընդդիմադիր պատգամավորների անցած ուղին ու ունեցվածքը՝ նպատակ ունենալով ապահովել պաշտոնատար անձանց ունեցվածքի թափանցիկությունը։ Այս անգամ ուսումնասիրել ենք Ազգային ժողովի «Քաղաքացիական պայմանագիր» խմբակցության պատգամավոր Լուսինե Ավետիսյանի կենսագրությունն ու 2025 թվականի տարեկան հայտարարագիրը։ Նշենք, որ Ավետիսյանը դեռ պատգամավորի պաշտոնը ստանձնելու հայտարարագիրը չի ներկայացրել։
Լուսինե Ավետիսյանը ծնվել է 1989 թվականի մարտի 25-ին Հոկտեմբերյանում։ 2012 թվականին ավարտել է Վանաձորի պետական մանկավարժական համալսարանի բանասիրության ֆակուլտետի «Հայոց լեզու և գրականություն» բաժինը, իսկ 2026 թվականին՝ ՀՀ պետական կառավարման ակադեմիայի «Կառավարման հոգեբանություն» մագիստրոսական ծրագիրը՝ ստանալով հոգեբանության մագիստրոսի աստիճան։ 2006 թվականին ավարտել է նաև Սուսաննա Ալեքսանյանի հեռուստառադիոհաղորդավարների դպրոցը։
Ավետիսյանը մասնագիտական տարբեր վերապատրաստումների և առաջնորդության ծրագրերի է մասնակցել, այդ թվում՝ ՄԱԿ-ի զարգացման ծրագրի, ԱՄՆ դեսպանատան, Ժողովրդավարության ազգային հիմնադրամի և ՅՈՒՆԻՍԵՖ-ի աջակցությամբ իրականացված նախաձեռնությունների։
2009-2010 թվականներին աշխատել է ՀՀ կառավարությանն առընթեր անշարժ գույքի կադաստրի պետական կոմիտեի Սպիտակի տարածքային ստորաբաժանումում՝ որպես էլեկտրոնային բազայի օպերատոր։ 2015-2019 թվականներին եղել է «Սպիտակի թռչնաբուծական կոմբինատ» ՍՊԸ-ի գործավար, իսկ 2019-2020 թվականներին՝ նույն ընկերության գործավար-օգնական։
2020-2026 թվականներին եղել է «Փեթակ» բարեգործական կազմակերպության հիմնադիր-նախագահը։ 2024-2026 թվականներին աշխատել է Սպիտակի Ա. Մյասնիկյանի անվան թիվ 1 հիմնական դպրոցում՝ որպես վարչատնտեսական համակարգող։ 2021-2026 թվականներին եղել է Սպիտակ խոշորացված համայնքի ավագանու «Քաղաքացիական պայմանագիր» խմբակցության անդամ։ 2026 թվականի հունիսի 7-ին ընտրվել է Ազգային ժողովի պատգամավոր՝ ՔՊ-ի համապետական ընտրական ցուցակով։
Անշարժ գույք․
Լուսինե Ավետիսյանի՝ 2025 թվականի տարեկան հայտարարագրի համաձայն՝ տարվա սկզբին նա ունեցել է երկու բնակարան՝ երկուսն էլ Սպիտակ համայնքում։ Դրանք ձեռք են բերվել համապատասխանաբար 2019 թվականի սեպտեմբերի 23-ին և 2020 թվականի փետրվարի 14-ին՝ գնման եղանակով։ Հայտարարագրում բնակարանների մակերեսների և այլ մանրամասների վերաբերյալ տվյալները պաշտպանված են։ Երկու բնակարաններն էլ ներկայացված են նաև տարվա վերջում առկա գույքի ցանկում։
Տրանսպորտային միջոցներ․
Ավետիսյանը հայտարարագրել է երկու ավտոմեքենա։ Դրանցից մեկը 1990 թվականի արտադրության MERCEDES-BENZ մակնիշի մեքենա է, որը նա ստացել է 2022 թվականի հունվարի 21-ին՝ նվիրատվության եղանակով։ Մյուսը 2017 թվականի արտադրության FORD մակնիշի ավտոմեքենա է, որը ձեռք է բերել 2025 թվականի փետրվարի 13-ին՝ 3 միլիոն 300 հազար դրամով։ Երկու մեքենաներն էլ ներառված են տարվա վերջում առկա տրանսպորտային միջոցների ցանկում։
Դրամական միջոցներ․
2025 թվականի սկզբին Ավետիսյանի բանկային հաշիվներից մեկում եղել է 320 հազար դրամ, իսկ մյուսում՝ 220 հազար դրամ։ Տարվա վերջում առաջին հաշվի մնացորդը կազմել է զրո դրամ, իսկ երկրորդինը՝ 217 հազար դրամ։ Կանխիկ դրամի մասով հայտարարագրել է երկու գումարային դիրք։ Դրանցից մեկի մնացորդը տարվա սկզբի 311 հազար դրամից տարեվերջին դարձել է 570 հազար դրամ, իսկ մյուսինը՝ 150 հազար դրամից նվազել է մինչև 54 հազար 500 դրամ։
Եկամուտներ․
2025 թվականի հայտարարագրում Լուսինե Ավետիսյանը նշել է 5 միլիոն դրամ ստացված փոխառություն՝ Հայէկոնոմբանկից։ Աշխատանքի վարձատրության և դրան հավասարեցված այլ վճարումների տեսքով «Փեթակ» բարեգործական կազմակերպությունից ստացել է 900 հազար դրամ, իսկ Սպիտակի Ա. Մյասնիկյանի անվան թիվ 1 հիմնական դպրոցից՝ 2 միլիոն 700 հազար 813 դրամ։
Հայտարարագրում նշված եկամուտների ընդհանուր գումարը կազմել է 8 միլիոն 600 հազար 813 դրամ, որից 5 միլիոն դրամը ստացված փոխառությունն է։
Վարկային պարտավորություններ․
2025 թվականի դեկտեմբերի 31-ի դրությամբ հայտարարագրում նշված վարկերի մայր գումարի մնացորդները կազմել են 270 հազար դրամ, 8 միլիոն 15 հազար 618 դրամ և 4 միլիոն 600 հազար դրամ։ Հայտարարագրում ներկայացված երեք պարտավորությունների ընդհանուր մնացորդը կազմել է 12 միլիոն 885 հազար 618 դրամ։ Դրանցից մեկի դեպքում որպես հիպոթեքի առարկա նշված է բնակարան։
Լուսինե Ավետիսյանը «Քաղաքացիական պայմանագիր» կուսակցության անդամ է և կուսակցության՝ Սպիտակի տարածքային կազմակերպության անդամ»։
Մանրամասները՝ «Ժողովուրդ» օրաթերթի այսօրվա համարում։