Ղարաբաղից բռնի տեղահանված անձանց բնակարանային աջակցության պետական ծրագրի շրջանակներում երևանամերձ համայնքներում բնակարան ձեռք բերելու համար ընտանիքում մեկ անձի հաշվով տրամադրվող 3 մլն դրամը կդառնա 4 մլն դրամ։ Այս մասին հայտարարել է վարչապետ Նիկոլ Փաշինյանը՝ մարտի 18-ին «Ներառական զարգացում. ձեռքբերումներ և անելիքներ» խորագրով համաժողովի ժամանակ։
«Մենք առաջիկայում որոշում կկայացնենք և երևանամերձ համայնքներում բնակարան ձեռք բերելու համար ընտանիքում մեկ անձի հաշվով տրամադրվող 3 մլն դրամը կդարձնենք 4 մլն դրամ։ Մեր որոշումը սա է, առաջիկայում նաև դե յուրե որոշումը կկայացնենք»,- նշել է վարչապետը։
Վարչապետը հավելել է, որ Երևանում բնակարան գնելու համար տրամադրվող գումարը չեն պլանավորում ավելացնել, որովհետև միտված են ծրագիրը դեպի մարզեր ուղղորդելուն։
Վարչապետը շեշտել է, որ 2023-ից ի վեր թեման եղել է կառավարության օրակարգի առաջնահերթ շարքում։
«Մենք այս ընթացքում, ըստ էության, տարբեր ձևաչափերով անընդհատ կապի մեջ ենք եղել Ղարաբաղից տեղահանված մեր քույրերի և եղբայրների հետ՝ տարբեր նախարարների մարզպետների համայնքների ղեկավարների ձևաչափերով, ունեցել ենք տարբեր աշխատանքային ֆորմատներ, և իհարկե կառավարության օրակարգում 2023-ից ի վեր այս թեման եղել է առաջնահերթ շարքում։ Ըստ էության, մենք նաև հրապարակային երկխոսության միջոցով փորձել ենք մեր քաղաքականությունների շրջանակներն ընդգծել Ղարաբաղից տեղահանված մեր հայրենակիցների համար, մեր ռազմավարական պատկերացումներն ավելի ընկալելի դարձնելու, և ինչպես ձևակերպում եմ՝ Հայաստանում տնավորվելու թեմայի վրա առավել մեծ կենտրոնացվածություն ցուցաբերելու նպատակով»,- հայտարարել է նա։
Նիկոլ Փաշինյանը տեղեկացրել է, որ պետական բյուջեից տարբեր ծրագրերով շուրջ 145 մլրդ դրամ է հատկացվել ԼՂ-ից տեղահանվածների կարիքները հոգալու համար։ Նա նաև անդրադարձել է ծրագրի հեռանկարին։
«Ես շատ կարևոր եմ համարում, որ մենք օգնենք Ղարաբաղից տեղահանված մեր քույրերին և եղբայրներին, որ այդ հոգեբանական փնտրտուքի վիճակից դուրս գան, որովհետև ես կարծում եմ, որ ինձ համար ակնհայտ է, որ մենք պետք է կենտրոնանանք նրա վրա, որ Հ ամեն ինչով աջակցենք, որ ստանան Հայաստանի Հանրապետության քաղաքացիություն, երկրորդը՝ տնավորվեն Հայաստանի Հանրապետությունում և հարատև իրենց և իրենց ընտանիքների ճակատագիրը կապեն Հայաստանի Հանրապետության հետ։ Սա շատ կարևոր և քաղաքական և հոգեբանական առումով շատ կարևոր է»,- ասել է վարչապետը։
The post Երևանամերձ համայնքներում տուն գնելու համար արցախցիներին տրամադրվող աջակցությունը կդառնա 4 մլն դրամ appeared first on CIVILNET.