«Հայ ազգային կոնգրեսը» պատրաստ է սկսել կոնսոլիդացիայի գործընթաց «Ուժեղ Հայաստան» կուսակցության և այլ ժողովրդավարական ու ռացիոնալ ուժերի հետ։ Այս մասին հայտարարել է ՀԱԿ վարչապետի թեկնածու Լևոն Զուրաբյանը՝ մարտի 14-ին ՀԱԿ 5-րդ համագումարին ներկայացնելով երկրի զարգացման առաջնահերթությունները։
«Ուստի հայտարարում ենք, որ պատրաստ ենք այդ նպատակով սկսել նաև կոնսոլիդացիայի գործընթաց՝ «Ուժեղ Հայաստան» կուսակցության և այլ ուժերի հետ միասին»,- նշել է Լևոն Զուրաբյանը։
Արտաքին քաղաքականության համատեքստում Զուրաբյանը կարևորել է հավասարակշռված և բազմավեկտոր մոտեցումը՝ նշելով, որ Հայաստանը չպետք է կողմնորոշվի գլոբալ աշխարհաքաղաքական հակամարտության ճամբարներից որևէ մեկի օգտին։ Ըստ նրա՝ երկիրը պետք է դիրքավորվի որպես համագործակցության կամուրջ՝ զարգացնելով վստահելի հարաբերություններ Ռուսաստանի, ԱՄՆ–ի, ԵՄ–ի, Իրանի, Հնդկաստանի և Չինաստանի հետ միաժամանակ։
«Արևմուտք–արևելք գլոբալ աշխարհաքաղաքական հակամարտության մեջ Հայաստանը չպետք է որևէ կողմ բռնի, այլապես մեր երկիրը կվերածվի գերտերությունների միջև պայքարի կռվախնձորի և կենթարկվի հակառակորդ կողմի կործանարար պատժամիջոցների»,- ասել է նա։
Տնտեսական զարգացման հիմքում Լևոն Զուրաբյանը դրել է արմատական տեխնոլոգիական արդիականացման ծրագիրը, որը կոչել է «Հայաստանի տեխնոլոգիական հեղափոխություն»։ Նա պնդել է, որ պետությունը պետք է հսկայական ֆինանսական ներդրումներ կատարի բարձր տեխնոլոգիաների խորշային սեգմենտներում՝ հատուկ ուշադրություն դարձնելով արհեստական բանականությանը, բիոտեխնոլոգիային և ֆինտեխին։
«Պետականորեն խրախուսվող տեխնոլոգիական առաջընթացը պետք է դառնա երկրի տնտեսական զարգացման, պաշտպանունակության և բանակի ամրապնդման, գիտության, կրթության, առողջապահության, ճարտարապետության և մշակույթի լոկոմոտիվը»,- ասել է նա։
Ներքին քաղաքականության և պետական կառավարման ոլորտում վարչապետի թեկնածուն առաջարկում է վերադառնալ 1990-ի կիսանախագահական մոդելին և ապահովել արդարադատության լիակատար անկախություն գործադիր իշխանությունից։ Զուրաբյանը խոստացել է դադարեցնել բոլոր քաղաքական հալածանքները, այդ թվում՝ հոգևորականների նկատմամբ, և ազատ արձակել քաղբանտարկյալներին։
«Պետք է վերջ դնել օրվա իշխանության շահերին ծառայող և քաղաքական խաղի կանոնները իշխանության կոնյունկտուրային շահերին հարմարեցնելու կործանարար էքսպերիմենտների պրակտիկան»,- հայտարարել է Զուրաբյանը։
The post «ՀԱԿ»-ը պատրաստ է կոնսոլիդացիայի գործընթաց սկսել «Ուժեղ Հայաստան»-ի հետ. Զուրաբյան appeared first on CIVILNET.