Համաշխարհային նավթային շուկան կբախվի աղետալի հետևանքների, եթե Իրանը շարունակի փակել Հորմուզի նեղուցը, ասել է Saudi Aramco-ի գործադիր տնօրեն Ամին Նասերը, հայտնում է Reuters-ը։
«Եթե [մատակարարման] խափանումները շարունակվեն, համաշխարհային նավթային շուկայի համար հետևանքները կլինեն աղետալի։ Որքան երկար տևի հակամարտությունը, այնքան ավելի ծանր կլինի ազդեցությունը համաշխարհային տնտեսության վրա», – ասել է Նասերը։
Նա նշել է, որ խափանումն արդեն խաթարել է նավագնացության և ապահովագրության ոլորտները և սպառնում է «դոմինոյի էֆեկտ» առաջացնել ավիացիայի, գյուղատնտեսության, ավտոմոբիլային և այլ արդյունաբերություններում։
Նա նշել է, որ համաշխարհային նավթի պաշարներն արդեն հինգ տարվա ամենացածր մակարդակի վրա են, և ճգնաժամը կարագացնի դրանց սպառումը։
Saudi Aramco-ն Սաուդյան Արաբիայի ազգային նավթային ընկերությունն է։ Այն կազմում է Սաուդյան Արաբիայի կառավարության եկամուտների մինչև 80%-ը։ Ընկերության գլխավոր գրասենյակը գտնվում է Դահրանում։ Saudi Aramco-ն 2021-ի Forbes Global 2000 ցուցակում աշխարհի խոշորագույն ընկերությունների շարքում զբաղեցրել է հինգերորդ տեղը։
Փետրվարի 28-ին Իսրայելն ու ԱՄՆ-ն լայնածավալ ռազմական հարձակում են սկսել Իրանի դեմ։ Հարձակման առաջին օրը սպանվել է Իրանի հոգևոր առաջնորդ Այաթոլլա Ալի Խամենեին։ Ռազմական գործողություններն ընդգրկում են Պարսից Ծոցի Արաբական երկրները։ Իրանն՝ ի պատասխան, հարվածներ է հասցնում տարածաշրջանի երկրների տարածքում տեղակայված ԱՄՆ բազաներին և Իսրայելին։ Իսրայելը հարվածում է նաև Լիբանանին։
ԱՄՆ-ի և Իսրայելի՝ Իրանի դեմ պատերազմը տարածվել է Հորմուզի նեղուցի վրա, որն աշխարհի ամենակարևոր էներգետիկ հանգույցներից է, ինչը հանգեցրել է նավթի գների կտրուկ աճի։
Նեղուցով բեռնափոխադրումները, որոնց բաժին է ընկնում համաշխարհային սպառվող նավթի մեկ հինգերորդը և գազի հսկայական քանակություն, գրեթե դադարեցվել են տարածաշրջանում նավթատար տանկերների վրա իրանական հարձակումների պատճառով։
The post Նավթի շուկան աղետալի հետևանքներ կունենա, եթե Հորմուզի նեղուցը չբացվի․ Saudi Aramco appeared first on CIVILNET.