Մեր հայրերին ու մայրերին ՔՊ-ն դարձրել է քաղաքական գործիք։
Եկեք տեսնենք, թե ինչ է արել ՔՊ-ն. թոշակներն ավելացրել է օրական 330 դրամով ու հարցը փակել՝ իբր մարդկանց կյանքի որակը փոխվեց, այն էլ՝ այս գնաճի պայմաններում։
Եկեք տեսնենք՝ արդյոք սա առաջընթաց է։
2025 թ. նվազագույն պարենային զամբյուղը 42,614 դրամ է։ Սա այն գումարն է, որով թոշակ ստացող մարդը կարողանա նվազագույն մթերքներ ձեռբերել․ որպեսզի գոյատևի և սովից չմահանա։
Բացի պարենային զամբյուղից, կա նաև նվազագույն սպառողական զամբյուղ՝ 78,836 դրամ։
Սպառողական զամբյուղը ներառում է ոչ միայն պարենային զամբյուղը, այլ նաեւ հագուստի, լույսի, ջրի, գազի և այլ վճարները։
Թոշակ ստացող մարդը շարունակելու է ապրել գոյատևման, ոչ թե արժանապատիվ կյանքի մակարդակում։
Ամենակարեւոր դիտարկումներից. երբ կենսաթոշակների բարձրացումը հայտարարվում է ընտրություններից 3 ամիս առաջ, ապա սա ոչ թե բարեփոխում է, այլ մեր հայրերի և մայրերի արժանապատվության ոտնահարում՝ քաղաքական հաշվարկներով։
Թոշակները, անկասկած, պետք է բարձրացվեն, բայց դա պետք է լինի մտածված քաղաքականություն, այլ ոչ թե ավագ սերնդի շահարկմամբ քաղաքական օգուտներ ստանալու ակցիա։
Մենք սոցիալական քաղաքականությունը կառուցելու ենք ոչ թե պատեհապաշտությամբ, այլ կյանքի որակի բարելավմանն ուղղված իրական ցուցանիշների վրա։
ՀՀ նախկին ՄԻՊ, Իրավունքի և արդարության կենտրոն «Թաթոյան» հիմնադրամի ղեկավար Արման Թաթոյան
Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը: