«Մեր ձևով» շարժման համակարգող Նարեկ Կարապետյանը Հայաստանում ջրամատակարարման 17-ժամյա ռեժիմի ներդրումն որակել է որպես պետական ռազմավարության սխալ քաղաքականության արդյունք
ԵՐԵՎԱՆ, 25 փետրվարի. /Նովոստի-Արմենիա/. «Տաշիր գրուպի» փոխնախագահ, «Մեր ձևով» շարժման համակարգող, «Ուժեղ Հայաստան» կուսակցության քաղաքական խորհրդի անդամ Նարեկ Կարապետյանը Հայաստանում ջրամատակարարման 17-ժամյա ռեժիմի ներդրումն որակել է որպես պետական ռազմավարության սխալ քաղաքականության արդյունք։
«Ժամը 12-ից մինչև առավոտյան ժամը 7-ը մեր երկրի մայրաքաղաքում 21-րդ դարում հազարավոր բնակիչներ ջուր չեն ունենալու։ Սա մեր պետական ռազմավարության սխալ քաղաքականության արդյունքն է և հիմնական կիզակետը»,-ասել է նա։
Ինչպես նշել է Կարապետյանը, ջուրն անհրաժեշտություն է, այլ ոչ թե ճոխություն, և այդ հարցը պետք է լուծվի ճիշտ կառավարման միջոցով։
«Ջրի կորուստները հասնում են 65%-ի, դրանք պայմանավորված են համակարգային ներդրումների բացակայությամբ, սխալ ներդրումային քաղաքականությամբ և սխալ կառավարմամբ»,- ասել է նա։
«Ինչ վերաբերում է էլեկտրաէներգիային, ապա վերջին չորս ամիսների ընթացքում, անցյալ տարվա համեմատ, Հայաստանում անջատումների քանակն աճել է 40%-ով։ Մեզ մոտ գրանցվել է տոտալ կոլապս նաև էներգետիկայի ոլորտում։ Անկում կա ջրամատակարարման մեջ, իսկ սխալ արտաքին քաղաքականության արդյունքում մենք վտանգի տակ ենք դնում նաև գազամատակարարման կայունությունը»,- չորեքշաբթի կայացած ճեպազրույցի ժամանակ նշել է Կարապետյանը։
Նրա խոսքով՝ սա շատ կարևոր մարտահրավեր է Հայաստանի համար. ջուրն անհրաժեշտություն է, այն ճոխություն չէ, և այս հարցը պետք է լուծվի ճիշտ կառավարման արդյունքում, քանի որ Հայաստանն ունի տարեկան 5 մլրդ խմ վերականգնվող ջրի պաշար, և այս խնդիրը Հայաստանում չպետք է լիներ։
«Մենք առաջարկում ենք ջրի կորուստների նվազեցում. այս ամենը կառավարության ձախողման ակնհայտ օրինակ է։ Ջրի կորուստները կապված են համակարգային ներդրումների և ճիշտ ներդրումային քաղաքականության բացակայության, ինչպես նաև սխալ կառավարման հետ»,- ասել է Կարապետյանը։
Նշենք, որ «Վեոլիա Ջուր» ՓԲԸ-ից տեղեկացրել են, որ մայիսի 1-ից սեպտեմբերի 16-ը ջուրը կմատակարարվի ժամը 07:00-ից մինչև 24:00-ն (օրական 17 ժամ)։