Հայաստանում 2025-ի ընթացքում մեղադրական եզրակացությամբ դատարան ուղարկված քրեական վարույթներով դատի է տրվել 298 հանրային ծառայող, այդ թվում ՀՀ նախագահ, վարչապետ, ԱԺ պատգամավոր։ Այս մասին փետրվարի 24-ին Ազգային ժողովի պետաիրավական հարցերի մշտական հանձնաժողովի նիստին հայտնեց Հակակոռուպցիոն կոմիտեի նախագահ Արթուր Նահապետյանը։
«Դատի տրված անձանց թվում են ՀՀ երկու նախագահ, վարչապետ, Ազգային ժողովի պատգամավոր, Պետական գույքի կառավարման վարչության պետ և դատական իշխանության հինգ աշխատակից, այդ թվում՝ երկու դատավոր։ Իրավապահ համակարգից վարույթներում ներգրավված են Ներքին գործերի նախարարության ոստիկանության 66 և Քննչական կոմիտեի 7 պաշտոնատար անձինք, իսկ պաշտպանական գերատեսչությունից՝ Պաշտպանության նախարարության ընդհանուր թվով 47 աշխատակից, ներառյալ Զինված ուժերի գլխավոր շտաբի պետի տեղակալ և զորամասերի հրամանատարական կազմի ներկայացուցիչներ»,- ներկայացրեց Նահապետյանը։
Զեկույցի համաձայն՝ մեղադրյալների թվում են նաև Պետական եկամուտների կոմիտեի 17, Շրջակա միջավայրի նախարարության 14, Արդարադատության նախարարության 6, Կադաստրի կոմիտեի 6 և Սննդամթերքի անվտանգության տեսչական մարմնի 6 աշխատակիցներ, այդ թվում՝ ղեկավար կազմից։
Ցանկում ընդգրկված են նաև Կրթության, գիտության, մշակույթի և սպորտի ու Աշխատանքի և սոցիալական հարցերի նախարարությունների 5-ական աշխատակիցներ, Առողջապահության նախարարության 4, Քաղաքաշինության, տեխնիկական և հրդեհային անվտանգության տեսչական մարմնի 2, ինչպես նաև Էկոնոմիկայի և Տարածքային կառավարման նախարարությունների մեկական ներկայացուցիչներ։
Պաշտոնատար անձանց շարքում նշվել են նաև Ռազմաարդյունաբերական կոմիտեի նախագահ, Բնապահպանության և ընդերքի տեսչական մարմնի տեսուչ, Ջրային կոմիտեի, քաղաքապետարանների, մարզպետարանների և համայնքապետարանների աշխատակիցներ, ինչպես նաև Մխիթար Հերացու անվան թիվ մեկ հիվանդանոցային համալիրի ակնաբուժական կլինիկայի մեկ ներկայացուցիչ։
Կոմիտեի նախագահը հավելեց, որ դատարան ուղարկված գործերից 19-ը առանձնացվել են որպես առավել բարդ, բազմադրվագ և հանրային հնչեղություն ունեցող քրեական վարույթներ։
The post 2025-ին 298 հանրային ծառայող, այդ թվում՝ նախագահ, վարչապետ, կանգնել են դատարանի առաջ appeared first on CIVILNET.