Մեծ Բրիտանիայում կանանց 33%-ը կենսաթոշակի անցնելուց հետո կարող է հայտնվել աղքատության մեջ։ Միաժամանակ տղամարդկանց և կանանց ակնկալվող կենսաթոշակային եկամուտների տարբերությունը զգալիորեն կրճատվել է, հաղորդում է Professional Pensions-ը՝ հղում անելով Scottish Widows-ի հետազոտությանը։
Հետազոտության համաձայն՝ բրիտանացի կանանց 33%-ը կարող է չապահովել կենսաթոշակային տարիքում ապրելու համար անհրաժեշտ նվազագույն եկամուտը։ Նախկինում այդ ցուցանիշը հասնում էր 39%-ի։
Կանանց ակնկալվող տարեկան կենսաթոշակային եկամուտը կազմել է 14.5 հազար ֆունտ ստերլինգ՝ մեկ տարվա ընթացքում աճելով 1.5 հազար ֆունտով։
Տղամարդկանց համապատասխան ցուցանիշը կազմում է տարեկան 18.3 հազար ֆունտ։ Այսպիսով, կենսաթոշակային եկամուտների գենդերային տարբերությունը կրճատվել է մինչև 3.8 հազար ֆունտ՝ նախկին 6–7 հազար ֆունտի դիմաց։
Հետազոտողները դրական փոփոխությունները կապում են աշխատավարձերի գենդերային տարբերության կրճատման, պետական կենսաթոշակների ակնկալվող աճի և անձնական խնայողությունների ավելացման հետ։
Այնուամենայնիվ, կենսաթոշակային ապահովության անհավասարությունը շարունակում է լուրջ խնդիր մնալ։ Scottish Widows-ի գնահատմամբ՝ կանանց 65%-ը կենսաթոշակի անցնելուց հետո կկարողանա ապահովել միայն նվազագույն կենսամակարդակ կամ նույնիսկ չի հասնի դրան։ Բավարար ֆինանսական ապահովվածությամբ ծերության հեռանկար ունի բրիտանացի կանանց ընդամենը 27%-ը։
Կենսաթոշակային խնայողությունների անբավարար մակարդակի հիմնական պատճառներից են աշխատանքային գործունեության ընդհատումները։ Կանայք ավելի հաճախ են դադարեցնում աշխատանքը երեխաների կամ տարեց հարազատների խնամքի համար, ինչի հետևանքով նվազում են նրանց աշխատանքային ստաժը և կենսաթոշակային վճարները։
Խնայողությունների ձևավորման վրա բացասաբար են ազդում նաև ամուսնալուծությունները, առողջական խնդիրներն ու ֆինանսական դժվարությունները։ Առավել խոցելի են ցածր եկամուտ ունեցող երիտասարդ կանայք, որոնք կարող են չհամապատասխանել գործատուների կենսաթոշակային ծրագրերում ավտոմատ ընդգրկվելու պայմաններին։
Հետազոտության համաձայն՝ սահմանված վճարներով կենսաթոշակային ծրագրերում տղամարդկանց և կանանց ակնկալվող կուտակումների տարբերությունը կազմում է 95 հազար ֆունտ ստերլինգ։
Scottish Widows-ի փորձագետները կարծում են, որ անհավասարությունը նվազեցնելու համար անհրաժեշտ են կենսաթոշակային համակարգի բարեփոխումներ, մասնավորապես՝ գործատուների կենսաթոշակային ծրագրերի հասանելիության ընդլայնում և ամուսնալուծության դեպքում կենսաթոշակային խնայողությունների պաշտպանության ուժեղացում։
Չնայած կենսաթոշակային եկամուտների վերաբերյալ կանխատեսումների բարելավմանը՝ բրիտանացի կանանց զգալի մասը շարունակում է ֆինանսական դժվարությունների բախվելու ռիսկի տակ մնալ աշխատանքային գործունեությունն ավարտելուց հետո։