Հասարակություն
11.11.2026 | 17:41
Երևանում թմրամիջոցների ապօրինի իրացման կասկածանքով ձերբակալվել և կալանավորվել է Էրեբունի վարչական շրջանի 36-ամյա բնակիչ։ Ոստիկանության տվյալներով՝ նրա բնակարանում հայտնաբերվել է ավելի քան 39 գրամ հերոին, 13 գրամ հալյուցինոգեն սնկեր, իսկ մեքենայում և թմրամիջոցների տեղադրման վայրում՝ ընդհանուր շուրջ 42 գրամ զանգվածով 21 փաթեթ։
ՆԳՆ ոստիկանության հաղորդագրությունը՝ ստորև․
Քրեական ոստիկանության գլխավոր վարչության թմրամիջոցների ապօրինի շրջանառության դեմ պայքարի վարչության ծառայողները ստացել էին օպերատիվ տվյալ, որ մայրաքաղաքի Էրեբունի վարչական շրջանի բնակիչ 36-ամյա տղամարդն ապօրինի ձեռք բերում և թաքստոցներում տեղադրելով իրացնում է թմրամիջոց։
Նոյեմբերի 2-ին՝ ժամը 13.30-ին, Երևանի Մոլդովական փողոցում փաթեթը տեղադրելիս և լուսանկարելիս տղամարդը ձերբակալվեց և իր «Նիսան Տեանա» մակնիշի մեքենայով հանդերձ տեղափոխվեց Համայնքային ոստիկանության Նոր Նորքի բաժին:
Ավան և Նոր Նորք վարչական շրջանների քննչական բաժնում նախաձեռնված քրեական վարույթի շրջանակում կատարված զննությամբ դեպքի վայրում հայտնաբերվեց արդեն տեղադրված երեք, իսկ մեքենայում՝ 18 փաթեթ՝ ընդհանուր մոտ 42 գրամ զանգվածներով։
36-ամյա տղամարդը հայտնեց, որ մարիխուանայով փաթեթները ձեռք է բերել տելեգրամյան հավելվածի միջոցով՝ իրացնելու նպատակով։
Նոյեմբերի 5-ին և 9-ին, դատարանի որոշմամբ, խուզարկություններ կատարվեցին տղամարդու փաստացի բնակության վայրում և նրա մեքենայում։ Տանը հայտնաբերվեց ավելի քան 39 գրամ հերոինով լցված պոլիէթիլենային 9 փաթեթ, ևս մեկ փաթեթ՝ 13 գրամ հալյուցինոգեն սնկերով և էլեկտրոնային կշեռք, իսկ մեքենայում՝ ավելի քան երեք գրամ դեղնականաչավուն զանգված, կաթուցիչ և չորս դեղահաբ։
36-ամյա տղամարդը կալանավորված է։ Նախաքննությունը շարունակվում է։