Հայաստանում Ռուսաստանի Դաշնության արտակարգ և լիազոր դեսպան Սերգեյ Կոպիրկինը Հանրային ռադիոյին տված հարցազրույցում հայտարարել է, որ Հայաստանի երկաթուղիների կառավարման կոնցեսիոն պայմանագրի պայմանները հայկական կողմի համար բացառապես բարենպաստ են։
Դիվանագետն ընդգծել է, որ մեծ տպավորություն է ստացել «Ռուսական երկաթուղիներ» ընկերության ղեկավարի ներկայացրած կոնցեսիոն աշխատանքի վերլուծությունից, որը ներառում է արդյունավետության ցուցանիշների համեմատությունը տարածաշրջանի և այլ երկրների երկաթուղիների հետ։
«Բուն կոնցեսիոն պայմանագիրը կազմված է հայկական կողմի համար բացառապես բարենպաստ, հնարավոր է՝ նույնիսկ աննախադեպ բարենպաստ պայմաններով»,- նշել է Կոպիրկինը։
Անդրադառնալով երկկողմ հետագա քայլերին՝ դեսպանը հիշեցրել է, որ հարցի շուրջ արդեն իսկ ստեղծվել է աշխատանքային խումբ։ Վերջինս եռամսյա ժամկետում պետք է պատասխաններ գտնի հայկական կողմին հուզող խնդիրներին՝ հաշվի առնելով տարածաշրջանային տրանսպորտային ու լոգիստիկ գործընթացների արդի դինամիկան։