Իրանի Իսլամական հեղափոխության պահապանների կորպուսը (ԻՀՊԿ) հանդես է եկել հայտարարությամբ՝ տեղեկացնելով 12-օրյա հակամարտությունից հետո երկրի հակաօդային պաշտպանության համակարգերի արագ արդիականացման և նորարարական ռազմական մշակումների ներդրման մասին։ Թեհրանում կայացած մամուլի ասուլիսի ժամանակ այս մասին մանրամասներ է ներկայացրել ԻՀՊԿ օդատիեզերական ուժերի պաշտոնական ներկայացուցիչ, բրիգադային գեներալ Հոսեյն Մոհեբբին։
Գեներալի փոխանցմամբ՝ նախորդած բախումների ընթացքում ԻՀՊԿ օդատիեզերական ուժերին հաջողվել է խոցել հակառակորդի ընդհանուր առմամբ 260 թռչող սարք։ Ավելին, Մոհեբբին պնդել է, որ վերջին շաբաթների ընթացքում Իրանին է հաջողվել անվնաս վիճակում առգրավել ամերիկյան արտադրության ևս յոթ MQM-170 հետախուզական անօդաչու թռչող սարք։
Անդրադառնալով անվտանգային մարտահրավերներին՝ ԻՀՊԿ պաշտոնական ներկայացուցիչը շեշտել է, որ ինտենսիվ հարվածների պայմաններում անգամ երկրում չի դադարել հրթիռների և ԱԹՍ-ների արտադրությունը։ Ավելին, ռազմարդյունաբերական համակարգի անվտանգությունն ապահովելու նպատակով հզորությունների մի զգալի մասը վերգետնյա հարթակներից տեղափոխվել է ապահով ստորգետնյա տարածքներ։ Օգտագործելով սեփական տեխնոլոգիական ներուժն ու երկրի լեռնաշխարհի առանձնահատկությունները՝ Իրանն ստեղծել է բազմաթիվ ստորգետնյա հրթիռային համալիրներ։
Որպես ռազմական ոլորտի առանցքային ձեռքբերումներ՝ Մոհեբբին առանձնացրել է հայրենական գիտատեխնիկական բազայի զարգացումը և սպառազինության կախվածությունը ներմուծումից արտահանման փուլ փոխադրելը։ Այս համատեքստում նա հատուկ հիշատակել է տեղական արտադրության «Arman» հրթիռը, «358» անօդաչու թռչող սարքը և «Խորդադ-3» ՀՕՊ ժամանակակից համակարգը։
Միջոցառման շրջանակում նաև նշվել է, որ Իրանն առաջիկայում հանրությանը կներկայացնի նոր մասնագիտացված ռազմական տեխնիկա։ ԻՀՊԿ ներկայացուցչի խոսքով՝ հնարավոր նոր սրացումների պարագայում իրանական կողմը պատրաստ է կիրառելու այնպիսի նորարարական հնարավորություններ, որոնք լուրջ անակնկալ կլինեն հակառակորդների համար։
Ամփոփելով խոսքը՝ գեներալ Մոհեբբին խստորեն նախազգուշացրել է Միացյալ Նահանգներին և Իսրայելին՝ ընդգծելով, որ ցանկացած սխալ հաշվարկ կամ ռազմական ավանտյուրա անխուսափելիորեն կհանգեցնի ծանր ու երկարաժամկետ հետևանքներ ունեցող հարվածների։