Քաղաքականություն
04.11.2026 | 19:29
Հայաստանը նախատեսում է ստորագրել «Անկախ Պետությունների Համագործակցության մասնակից պետությունների արդարադատության նախարարությունների համագործակցության մասին» համաձայնագիրը։ Այն նախատեսվում է ստորագրել նոյեմբերի 10-ին Երևանում կայանալիք ԱՊՀ արդարադատության նախարարների խորհրդի 20-րդ նիստի շրջանակում։
Համաձայնագրի նպատակն է զարգացնել ԱՊՀ երկրների արդարադատության նախարարությունների համագործակցությունը, մասնավորապես՝ պետական քաղաքականության իրականացման, իրավական տեղեկատվության, մասնագիտական փորձի փոխանակման և թվային նախագծերի ուղղություններով։
Համաձայնագրով նախատեսվում է կազմակերպել աշխատանքային հանդիպումներ, խորհրդատվություններ, ինչպես նաև փոխանակել իրավական ակտեր և մասնագիտական նյութեր։
Փաստաթղթի հիմնավորման համաձայն՝ դրա ստորագրումը կարևորվում է նաև նրանով, որ 2026 թվականին ԱՊՀ արդարադատության նախարարների խորհրդի նախագահությունը ստանձնել է Հայաստանը։
Համաձայնագրի երկարաժամկետ ակնկալվող արդյունքը Հայաստանի արդարադատության նախարարության իրավասության շրջանակում գործընթացների կատարելագործումն է՝ ԱՊՀ երկրների փորձի ուսումնասիրման և կիրառման միջոցով։
Նարեկ Կիրակոսյան