Աստղային կյանքն ու հաջողությունը միշտ չէ, որ ավարտվում են մահկանացուն կնքելուց հետո: Forbes ամսագիրը հրապարակել է իր ամենամյա ավանդական վարկանիշային ցանկը, որտեղ ներկայացված են այն մահացած երաժիշտները, դերասանները, գրողներն ու մարզիկները, որոնց անունն ու ժառանգությունը շարունակում են հսկայական եկամուտներ բերել նրանց ժառանգներին ու հիմնադրամներին։
Այս տարվա ցանկում ընդգրկվել են ինչպես ավանդական առաջատարները, այնպես էլ նոր անուններ, ինչպիսիք են Քուինսի Ջոնսը, Դոլի Փարթոնը և Դայան Քիթոնը։
Ո՞վ է գլխավորում ցուցակը
-
Մայքլ Ջեքսոն (Michael Jackson) — 105 միլիոն դոլար
Փոփ երաժշտության արքան շարունակում է վստահորեն գլխավորել վարկանիշը: Նրա ժառանգության հիմնական եկամուտները ձևավորվում են «MJ: The Musical» բրոդվեյան շոուից, հեղինակային իրավունքների վաճառքից, ինչպես նաև Ջեքսոնի կյանքի մասին պատմող սպասվելիք կենսագրական ֆիլմի (biopic) շուրջ մեծ հետաքրքրությունից:
-
The Notorious B.I.G. — 80 միլիոն դոլար
Լեգենդար ռեփերն այս տարի զգալի թռիչք է գրանցել ցուցակում: Եկամտի ռեկորդային աճը պայմանավորված է նրա երաժշտական կատալոգի հետ կապված խոշոր գործարքով, որը փակվել է նրա մոր՝ Վոլետա Ուոլեսի մահից կարճ ժամանակ առաջ:
-
Մայլս Դևիս (Miles Davis) — 21 միլիոն դոլար
Ջազային լեգենդի հարյուրամյակի առթիվ կազմակերպված համերգաշարերը (այդ թվում՝ Նյու Յորքի Լինքոլն կենտրոնում) և նրա մասին նկարահանվող նոր ֆիլմի նախագիծն ապահովել են նշանակալի եկամուտներ։
-
Էլվիս Փրեսլի (Elvis Presley) — 17 միլիոն դոլար
Ռոքնռոլի արքայի եկամուտները ձևավորվում են Գրեյսլենդի (Graceland) տուրիստական հոսքից և Authentic Brands Group-ի հետ լիցենզիոն պայմանագրերից:
-
Բոբ Մարլի (Bob Marley) — 13 միլիոն դոլար
Չնայած երաժշտական իրավունքների մեծ մասը պատկանում է Universal Music Group-ին, Մարլիի ընտանիքը ստեղծել է բրենդային հսկայական կայսրություն՝ աուդիոսարքավորումներ, սուրճ, բուրմունքներ, հագուստ և այլ ապրանքներ:
-
Քոբի Բրայանտ (Kobe Bryant) — 10 միլիոն դոլար
Լեգենդար բասկետբոլիստի ընտանիքի և Nike-ի միջև երկարաձգված համագործակցությունը և «Kobe» ենթաբրենդի ներքո նոր ապրանքների թողարկումը շարունակում են բարձր շահույթ ապահովել:
Ի՞նչն է ապահովում հետմահու եկամուտները
Հոդվածում ընդգծվում է, որ հետմահու միլիոնավոր դոլարների գոյացման հիմնական աղբյուրներն են.
-
Երաժշտական կատալոգների վաճառքը. Խոշոր ձայնագրման ընկերությունները միլիոնավոր դոլարներ են վճարում հանգուցյալ արտիստների երգերի իրավունքները լիովին ձեռք բերելու համար:
-
Բրենդավորում և լիցենզավորում. Հայտնի դեմքերի անուններով ապրանքների, հագուստի և հուշանվերների թողարկումը:
-
Կենսագրական ֆիլմեր և շոուներ. Հոլիվուդյան ֆիլմերն ու բրոդվեյան մյուզիքլները նոր շունչ են տալիս արտիստների ժառանգությանը՝ հետաքրքրություն առաջացնելով նաև երիտասարդ սերնդի մոտ: