2026 թվականի հունվարի 1-ից հոկտեմբերի 12-ը Հայաստանից 30 երկիր արտահանվել է 908,6 տոննա ծաղիկ։ Նախորդ տարվա նույն ժամանակահատվածի համեմատ արտահանման աշխարհագրությունն ընդլայնվել է 23 նոր շուկայով։ Հայկական ծաղիկներն արտահանվել են նաև Եվրամիության անդամ 14 երկիր, այդ թվում՝ Նիդերլանդներ, Գերմանիա, Բելգիա, Իտալիա և Ֆրանսիա։
ՀՀ ԱԳՄԱ նախարարության հաղորդագրությունը՝ ստորև․
«Հայաստանը շարունակում է դիվերսիֆիկացնել իր արտաքին տնտեսական կապերը՝ ընդլայնելով հայկական արտադրանքի ներկայությունը միջազգային շուկաներում։
Ծաղիկների արտահանում
2026 թվականի հունվարի 1-ից հոկտեմբերի 12-ը Հայաստանից 908,6 տոննա ծաղիկ է արտահանվել 30 երկիր՝ այդ թվում՝ ինչպես դեպի հարևան երկրներ (Թուրքիա, Իրան, Վրաստան), այնպես էլ Եվրոպայի (ԵՄ 14 անդամ երկիր և Շվեյցարիա, Մոլդովա, Ուկրաինա, Սերբիա), Մերձավոր Արևելքի (ԱՄԷ, Օման), Կենտրոնական Ասիայի (Թուրքմենստան, Ղազախստան, Ղրղզստան, Ուզբեկստան) և Հյուսիսային Ամերիկայի (ԱՄՆ) շուկաներ։
Կարևոր է արձանագրել, որ նախորդ տարվա նույն ժամանակաշրջանի համեմատությամբ ծաղիկների արտահանման աշխարհագրությունը զգալիորեն ընդլայնվել է։ Եթե նախորդ տարի արտահանումն իրականացվում էր միայն Ֆրանսիա, ԱՄԷ, Ղազախստան, Ղրղզստան, Բելառուս, Վրաստան և Ռուսաստանի Դաշնություն, ապա ընթացիկ տարում ուղղությունների ցանկն համալրվել է 23 նոր շուկաներով:
ԵՄ երկրներից հայկական ծաղիկները մինչ այս պահն արդեն «հյուրընկալվել» են Նիդերլանդներում, Ավստրիայում, Բելգիայում, Բուլղարիայում, Գերմանիայում, Լատվիայում, Էստոնիայում, Լիտվայում, Իտալիայում, Լեհաստանում, Կիպրոսում, Չեխիայում, Ռումինիայում և Ֆրանսիայում:
Հավելենք, որ հոկտեմբերի 10-ից ուժի մեջ են մտել Հայաստանի համար ԵՄ առևտրային ինքնավար միջոցները (ATMs):
Տեսանյութում՝ հայկական ծաղկարտադրության ոլորտի և արտահանման մասին՝ թվերով։
Հիշեցնենք, որ 2026 թվականի մայիսից Ռուսաստանի կողմից հայկական մի շարք ապրանքների ներմուծման և տարանցման նկատմամբ սահմանափակումներ կիրառելուց հետո ՀՀ կառավարությունը որոշել էր ֆինանսական աջակցություն տրամադրել արտահանողներին՝ նոր շուկաներ մուտք գործելու նպատակով։ Մասնավորապես, հուլիսին ԵՄ երկրներ, Մեծ Բրիտանիա և Շվեյցարիա արտահանվող ծաղիկների համար սահմանվել էր 50 դրամ փոխհատուցում՝ յուրաքանչյուր հատի դիմաց։
Բացի այդ, հոկտեմբերի 10-ից ուժի մեջ է մտել հայկական որոշ ապրանքների համար ԵՄ-ի սահմանած առևտրային արտոնյալ ռեժիմը, որով երկու տարով կասեցվում կամ նվազեցվում են մի շարք ապրանքների ներմուծման մաքսատուրքերը։