Քաղաքականություն
20.10.2026 | 12:01
Ռուսական զորքերը հոկտեմբերի լույս 20-ի գիշերը 165 անօդաչու թռչող սարքով հարձակվել են Ուկրաինայի վրա, որոնցից 115-ը խոցվել է։ Այս մասին հայտնել են Ուկրաինայի զինված ուժերի ռազմաօդային ուժերի հրամանատարությունից, գրում է Current time-ը։
Կիևի մարզում ռուսական հարձակման հետևանքով 3 մարդ է զոհվել, ևս 6-ը՝ վիրավորվել։ Ուկրաինայի արտակարգ իրավիճակների պետական ծառայության տվյալներով՝ հարվածը հասցվել է Օբուխովի շրջանում գտնվող արտադրական և պահեստային շինությանը։ Հրդեհը մարվել է, իսկ փրկարարները շարունակում են փլատակների մաքրման աշխատանքները։
Իզյումում հարվածի տակ են հայտնվել բնակելի թաղամասերն ու քաղաքացիական ենթակառուցվածքները։ Վիրավորվել է հինգ մարդ։ Վնասվել են բնակելի տներ, տարբեր շինություններ և ավտոմեքենաներ։
Օդեսայի մարզում վնասվել են էներգետիկ ենթակառուցվածքի օբյեկտներ։ Տուժածներ չկան։
Խմելնիցկիում հարձակման է ենթարկվել ձեռնարկություններից մեկը։ Ոչ ոք չի տուժել, հայտնել է մարզային ռազմական վարչակազմի ղեկավար Սերգեյ Տյուրինը։
Հոկտեմբերի 20-ի առավոտյան Ռուսաստանը հարձակվել է Դնեպրի և դրա արվարձանների վրա։ Մարզային ռազմական վարչակազմի ղեկավար Ալեքսանդր Գանժայի տվյալներով՝ հարձակման հետևանքով հրդեհ է բռնկվել, 3 մարդ տուժել է։
Ռուսաստանի ՊՆ-ն պնդում է, որ հարվածների հետևանքով խոցվել են Խմելնիցկիում գտնվող «Գրանդ Իմպորտ» լոգիստիկ կենտրոնը, Վոլինի մարզի Կովել քաղաքում գտնվող «Վինդոր Տրանս Սերվիս» տրանսպորտային-լոգիստիկ կենտրոնը, Ռենի նավահանգստում երեք բեռնատար նավ ու ևս մեկ բեռնանավ, որն ուղևորվում էր դեպի Օդեսայի նավահանգիստ։
Թարգմանությունը՝ Էմմա Չոբանյանի