Հոկտեմբերի 15-ը՝ ձեռքերը լվանալու համաշխարհային օր
Բաժանորդագրվեք Zarkerak.am-ի տելեգրամ ալիքին։
Առողջապահության նախարարությունը (ԱՆ) հաղորդագրություն է տարածել՝ կարևորելով ձեռքերի ճիշտ և կանոնավոր լվացման դերը վարակիչ հիվանդությունների կանխարգելման գործում։
«Մաքուր ձեռքեր՝ առողջության պահպանման պարզ, բայց կարևոր քայլ։
Գիտե՞ք, որ ձեռքերի ճիշտ լվանալը վարակիչ հիվանդությունների կանխարգելման ամենապարզ, մատչելի և արդյունավետ միջոցներից է։
Օրվա ընթացքում մեր ձեռքերը շփվում են բազմաթիվ մակերեսների հետ, որոնց վրա կարող են լինել հիվանդածին մանրէներ։ Չլվացած ձեռքերով աչքերին, քթին կամ բերանին դիպչելը կարող է նպաստել դրանց՝ օրգանիզմ ներթափանցմանը։
Ե՞րբ է հատկապես կարևոր լվանալ ձեռքերը
Սնունդ պատրաստելուց և ուտելուց առաջ։
Սանհանգույցից օգտվելուց հետո։
Հազալուց, փռշտալուց կամ քիթը մաքրելուց հետո։
Հիվանդ մարդուն խնամելուց առաջ և հետո։
Դրսից տուն վերադառնալիս և տեսանելի աղտոտվածության դեպքում։
Իսկ ինչպե՞ս ճիշտ լվանալ ձեռքերը։
Թրջեք ձեռքերը մաքուր, հոսող ջրով։
Օճառեք և մանրակրկիտ շփեք ափերը, ձեռքերի արտաքին մակերեսները, մատների արանքները և եղունգների շրջանը։
Շփեք առնվազն 20 վայրկյան։
Լվացեք հոսող ջրով և չորացրեք մաքուր սրբիչով կամ մեկանգամյա օգտագործման թղթե անձեռոցիկով։
Սովորեցնենք երեխաներին ձեռքերը ճիշտ լվանալ և ինքներս դառնանք օրինակ
Վարակների կանխարգելումը սկսվում է մաքուր ձեռքերից»,- նշվում է հաղորդագրությունում։