«Հայաքվե» ազգային քաղաքացիական միավորումը Եվրոպական միության արտաքին գործերի և անվտանգության քաղաքականության հարցերով բարձր ներկայացուցիչ, Եվրոպական հանձնաժողովի փոխնախագահ Կայա Կալլասի գրասենյակից ստացել է արձագանք՝ Ավետիք Չալաբյանի նկատմամբ իրականացվող ապօրինի քրեական վարույթի վերաբերյալ «ՀայաՔվեի» և պաշտպանական թիմի կողմից օգոստոսին բարձրացված մտահոգությունների կապակցությամբ։
Հոկտեմբերի 13-ով թվագրված պաշտոնական նամակում Կայա Կալլասի անունից հայտնում են, որ ԵՄ-ն պատշաճ ուշադրության կենտրոնում է պահում «Հայաքվեի» բարձրացրած հարցերը՝ ընդգծելով օրենքի գերակայության, հիմնարար իրավունքների և արդար դատաքննության երաշխիքների կարևորությունը, որոնք առանցքային նշանակություն ունեն Հայաստան – ԵՄ գործընկերության շրջանակում։
«Հայաքվե»-ն շարունակելու է հետևողականորեն բարձրաձայնել Հայաստանում իրավունքի գերակայության և արդար դատաքննության երաշխիքների ապահովման վերաբերյալ իր մտահոգությունները՝ դրանք հասցնելով միջազգային գործընկերներին։
«Հայաքվե» ազգային քաղաքացիական միավորում
Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը: