Հոկտեմբերի 14-ին Երևան կատարած աշխատանքային այցի շրջանակում «Ռուսական երկաթուղիներ» ԲԲԸ-ի գլխավոր տնօրեն, վարչության նախագահ Օլեգ Բելոզյորովը հանդիպել է Հայաստանի Հանրապետության վարչապետ Նիկոլ Փաշինյանի հետ։
Հանդիպման ընթացքում քննարկվել է Հայաստանի երկաթուղիների կառավարման կոնցեսիոն պայմանագրի իրականացումը։
Օլեգ Բելոզյորովը ներկայացրել է «Հարավկովկասյան երկաթուղի» ՓԲԸ-ի՝ «Ռուսական երկաթուղիներ» ԲԲԸ-ի դուստր ընկերության գործունեության արդյունքները։ Այդ ընկերությունն ապահովում է կոնցեսիոն պայմանագրի իրականացումը։ Նա նաև վարչապետի դեմքով հավաստիացրել է Հայաստանի կառավարությանը, որ ընկերությունը հավատարիմ է իր ստանձնած բոլոր պարտավորություններին։
«Երկաթուղայինների խնդիրն է ապահովել մեր երկրների տնտեսությունների տրանսպորտային կապը։ Կոնցեսիան հնարավորություն է տվել պահպանել և զարգացնել Հայաստանի երկաթուղային ենթակառուցվածքը՝ վերականգնման և պահպանման ծախսերը չդնելով հանրապետության բյուջեի վրա։ Ամբողջ շահույթն ուղղվել է երկաթուղու զարգացմանը։
Կոնցեսիայի գործողության ընթացքում «Ռուսական երկաթուղիներ» ԲԲԸ-ի միջոցներից կատարված ներդրումների և «Հարավկովկասյան երկաթուղու» եկամուտների ընդհանուր ծավալը կազմել է 146 միլիարդ հայկական դրամ կամ շուրջ 400 միլիոն ԱՄՆ դոլար։
Մենք պատրաստ ենք երկխոսել Հայաստանի կառավարության հետ և համատեղ գնահատել կոնցեսիոն համաձայնագրի արդյունավետությունը։ Մեր կողմից մտադիր ենք հաստատակամորեն կատարել ստանձնած բոլոր պարտավորությունները», — հայտարարել է Օլեգ Բելոզյորովը։
Հայաստանի երկաթուղիների կառավարման կոնցեսիոն համաձայնագիրը ստորագրվել է 2008 թվականին՝ 30 տարի ժամկետով, երկարաձգման իրավունքով։ Ներկայումս «Հարավկովկասյան երկաթուղի» ՓԲԸ-ն խոշորագույն հարկատուներից է, որը զգալի ներդրում ունի հանրապետության բյուջեի ձևավորման գործում։ Այն նաև երկրի կարևորագույն և խոշոր գործատուներից մեկն է։
«Հայաստանի երկաթուղիները 1520 մմ լայնությամբ երկաթուղային ցանցի անբաժանելի մասն են, որը գործում է հետխորհրդային ողջ տարածքում։ Հայ գործընկերների հետ համագործակցությամբ ռուսական կողմը պատրաստ է ապահովել անհրաժեշտ բեռնահոսքերը և պայմաններ ստեղծել փոխադրվող ուղևորների թվի աճի համար», – նշել է «Ռուսական երկաթուղիներ» ԲԲԸ-ի ղեկավարը։
Նա հավելել է, որ այդ նպատակով «Հարավկովկասյան երկաթուղին» հետևողականորեն արդիականացնում է ենթակառուցվածքներն ու ուղևորատար շարժակազմը։ Մասնավորապես՝ 2021 թվականին մատակարարվել է «Տրանսմաշհոլդինգ» ԲԲԸ-ի արտադրության 27 նոր վագոն, իսկ մի քանի տարվա ընթացքում ձեռք է բերվել նաև ԷՊ2Դ մոդելի չորս նոր էլեկտրագնացք։
Հանդիպման արդյունքներով կողմերը պայմանավորվել են ստեղծել համատեղ աշխատանքային խումբ՝ Հայաստանի երկաթուղային ցանցի օգտագործմամբ տարանցիկ հաղորդակցությունների հնարավորությունները գնահատելու նպատակով։
«ՌՈՒՍԱԿԱՆ ԵՐԿԱԹՈՒՂԻՆԵՐ» ԸՆԿԵՐՈՒԹՅԱՆ ՄԱՄՈՒԼԻ ԾԱՌԱՅՈՒԹՅՈՒՆ
Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը: