Մամուլում տեղեկություններ են տարածվել, ըստ որի «Գուստավ» ռեստորանի մենեջերը գաղտնի նկարահանումներ է իրականացրել կանանց զուգարանում։
Ավելի վաղ հայտնել էինք, որ մի կին հայտնել է, որ ռեստորանի մենեջերը, իր հեռախոսը տեղադրել է կանանց զուգարանի լվացարանի տակ և գաղտնի նկարահանել այցելուներին։ Երբ կինը հայտնաբերել է հեռախոսը և առերեսել մենեջերին, վերջինս հաստատել է, որ հեռախոսն իրենն է։
ՆԳՆ մամուլի քարտուղար Նարեկ Սարգսյանը հայտնել է, որ առերևույթ հանցագործության մասին հաղորդում է ներկայացվել Քննչական կոմիտե։
Իսկ ռեստորանի տարածած հայտարարությունից պարզ է դառնում, որ ռեստորանի աշխատակիցն ազատվել է աշխատանքից․ «Իրավիճակին տեղեկանալուն պես մենք անմիջապես քայլեր ենք ձեռնարկել և մենեջերը ազատվել է աշխատանքից։ Մենք նաև անձամբ կապ ենք հաստատել այն մարդկանց հետ, ովքեր մեզ տեղեկացրել են տեղի ունեցածի մասին, և մեր լիարժեք աջակցությունն ենք հայտնել նրանց՝ իրավական մարմիններին դիմելու հարցում»։