Բժիշկներն ու դեղագետները քննություն կհանձնեն․ հայտնի է ժամկետը

«Մինչև 2001 թ. Հայաստանում ֆիզիկական անձանց և բուժաշխատողների լիցենզավորում էր տեղի ունենում, սակայն գործընթացը որոշակի պատճառներով կասեցվեց: Երկար ժամանակ չկար, հետո որոշեցին բուժաշխատողների կառավարչական որոշակի փոփոխություններ իրականացնել, և 2015-16 թթ. մշակվեցին իրավական ակտեր, որոնք վերաբերում էին բուժաշխատողների հավաստագրմանը: Այժմ բուժաշխատողներին վերաբերվող ռեֆորմն էլ ավելի է խորացել»,- «Արմենպրեսի» մամուլի սրահում կայացած ասուլիսում նշեց ՀՀ ԱՆ Առողջապահության ազգային ինստիտուտի տնօրեն Ալեքսանդր Բազարչյանը:

Նրա խոսքով, Հայաստանում բուժաշխատողի մասնագիտական գործունեության թույլտվությունը համարվելու է անհատական լիցենզիան, որը ստանալու համար բուժաշխատողը պետք է անցնի կենտրոնացված քննություն, որի հարցաշարերը հասանելի կլինեն նոյեմբեր ամսին: ՀՀ առողջապահության նախարարի հրամանով արդեն հաստատվել են կենտրոնացված քննական հանձնաժողովների կազմերը։

«2027 թվականի հունվարից պատրաստ ենք լինելու քննությունների անցկացմանը։ Շուրջ 20 հազար ավագ բուժաշխատող ու դեղագետ պետք է քննություն հանձնեն»,- հավելեց Ալեքսանդր Բազարչյանը: Նա հորդորեց բժիշկներին մինչև տարեվերջ քննությունների համար գրանցվել բուժաշխատողների ռեգիստրի միջոցով:

Առողջապահության ազգային ինստիտուտի տնօրենի իրավական հարցերով խորհրդական Կարինե Աբրահամյանն էլ տեղեկացրեց, որ քննությունները լինելու են առցանց, յուրաքանչյուր թեստ բաղկացած կլինի 30 հարցից, ու ամեն թեստի համար կտրամադրվի 60 րոպե ժամանակ: Նրա խոսքով, բժիշկները 3 անգամ քննություն հանձնելու հնարավորություն կունենան:

Կենտրոնացված քննությունը հաջող հանձնելուց հետո բուժաշխատողը պետք է ներկայացնի լիցենզավորման հայտ, ապա օրենսդրությամբ նախատեսված անհրաժեշտ փաստաթղթերը բուժաշխատողների ռեգիստր մուտքագրելուց հետո հնարավորություն կունենա ստանալու անհատական լիցենզիա։

Մինչև 2027 թվականի հուլիսի 1-ը բժիշկները, դեղագետները պետք է հանձնած լինեն քննությունները։

Գոհար ՀԱԿՈԲՅԱՆ