Չորեքշաբթի, 16 Սեպտեմբեր 2026-ի երեկոյեան, Պիքֆայայի Սուրբ Աստուածածին Վանքին մէջ, Ն.Ս.Օ.Տ.Տ. Արամ Ա. Կաթողիկոս ընդունեց այցելութիւնը Սոցիալ Դեմոկրատ Հնչակեան Կուսակցութեան Լիբանանի շրջանի վարիչ մարմինը ներկայացնող պատուիրակութեան, գլխաւորութեամբ ատենապետ Վանիկ Տագէսեանի եւ ընկերակցութեամբ կուսակցութեան կեդրոնական վարչութեան անդամ Ալեքսան Քէօշկէրեանի։
Հանդիպումը առիթ հանդիսացաւ քննարկելու Լիբանանի ներկայ քաղաքական, ապահովական, տնտեսական եւ ընկերային կացութիւնը, ինչպէս նաեւ երկիրը յուզող վերջին զարգացումները։
Անդրադարձ կատարուեցաւ նաեւ Միջին Արեւելքի ընդհանուր իրավիճակին, շրջանային լարուածութիւններուն եւ անոնց ազդեցութեան՝ Լիբանանի, Հայաստանի եւ սփիւռքահայ գաղութներուն վրայ։ Քննարկուեցան Հայաստանի առջեւ ծառացած քաղաքական եւ ազգային մարտահրաւէրները, ինչպէս նաեւ Հայրենիք-Սփիւռք գործակցութեան ամրապնդման ուղիները։
Այս մտերմիկ խորհրդակցութեան ընթացքին զրուցակիցները վերահաստատեցին հետեւողական համագործակցութեան իրենց պատրաստակամութիւնը՝ ի սպաս հայ ժողովուրդի ազգային շահերուն եւ Լիբանանի կայունութեան ու բարգաւաճման:
Վեհափառ Հայրապետը ներկաներուն թելադրեց իր հայրապետական օրհնութիւնը փոխանցելու յառաջիկայ օրերուն Երեւանի մէջ կայանալիք Հնչակեան կուսակցութեան ընդհանուր ժողովին։ Նորին Սրբութիւնը նաեւ շեշտեց միջ-կուսակցական գործակցութեան կարեւորութիւնը՝ Լիբանանէն եւ Սփիւռքի մեր բոլոր գաղութներէն ներս։
Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը: