«Մենք գոհունակությամբ ենք հետևում Ադրբեջանի և Հայաստանի միջև տևական խաղաղության հաստատմանն ուղղված վերջին զարգացումներին, ինչպես նաև այս հարցում Ադրբեջանի կառուցողական դիրքորոշմանը։ Մենք նաև կարծում ենք, որ այս գործընթացի ավարտը մեր տարածաշրջանում համագործակցության նոր դարաշրջան կբացի»,- Բաքվում ասուլիսի ժամանակ ասել է Թուրքիայի արտաքին գործերի նախարար Հաքան Ֆիդանը՝ Ադրբեջանի և Հայաստանի միջև խաղաղության մասին։
Նրա խոսքով՝ իրենք ցանկանում են, որ Հարավային Կովկասը հայտնի լինի «ոչ թե հակամարտություններով, այլ խաղաղությամբ, տրանսպորտով, էներգետիկայով, առևտրով և տնտեսական զարգացմամբ»։
– Իրանի անվտանգությունը, կայունությունն ու բարգավաճումն անմիջական ազդեցություն ունեն մեր տարածաշրջանի վրա։ Մերձավոր Արևելքում հակամարտությունը հնարավորինս շուտ լուծվի դիվանագիտական ճանապարհով։ Վերջին փոխադարձ հարձակումները լրջորեն խաթարում են խաղաղությանն ուղղված ջանքերը։ Այս գործողությունները, որոնք սրում են տարածաշրջանային լարվածությունը, պետք է անհապաղ դադարեցվեն։ Էական է ապահովել անվտանգ, անխափան և ազատ անցում Հորմուզի նեղուցով և հնարավորինս շուտ վերականգնել պատերազմից առաջ գոյություն ունեցած կարգավիճակը (ստատուս քվոն)։
– Անցած տարվա ընթացքում [Ռուսաստան-Ուկրաինա] պատերազմն իսկապես վերածվել է հյուծող պատերազմից՝ ոչնչացման պատերազմի: Այլևս չկա որևէ վայր, որը զերծ կլինի հարձակումներից։ Մենք նաև ականատես ենք լինում քաղաքացիական բնակչության շրջանում զոհերի թվի կայուն աճին։ Որպես ազգ, որը գիտի, թե ինչ է պատերազմը, և հասկանում է, թե ինչպես պետք է այն վարել, մենք սկզբից ի վեր հասկանում էինք, թե դա ուր կտանի։ Իրավիճակը կշարունակի սրվել։ Աշխարհագրական, մեթոդաբանական և նպատակների տեսանկյունից մենք, ցավոք, հասել ենք հենց այս կետին։ Սա պետք է կասեցնել՝ կանխելու համար վարակի հետագա տարածումը և նոր աղետներից խուսափելու համար։ Պարբերաբար հայտարարություններ են հնչում պատերազմի՝ ոչ միայն Սև ծովի, այլև Եվրոպայի այլ երկրներ տարածվելու հավանականության մասին։ Աստված մի արասցե.