Ավտոկայանատեղիների ապօրինի կազմակերպման վերաբերյալ արդեն ունեմ ձևավորված կարծիք, որ մենք պետական համակարգում ունենք անձինք, որոնք սպասարկում են այդ գործընթացը և որոշակի պաշտպանություն են փորձում տալ: Այս մասին այսօր Երեւանի քաղաքապետարանի գործակարգավարական խորհրդակցության ժամանակ հայտարարեց Երևանի քաղաքապետ Տիգրան Ավինյանը:
«Ես կարծում եմ, որ պետք է շարունակաբար այս երևույթը վերացնել քաղաքից, քաղաքի կենտրոնից»,-հավելեց Ավինյանը։
Նա առաջարկեց տրանսպորտի վարչությանը՝ առևտրի վարչության հետ համատեղ, քննարկել այդ գործունեությունը օրինական դաշտ բերելու տարբերակները, որպեսզի, ըստ նրա, միջին մակարդակի պաշտոնյաներ, այդտեղ սև փող չաշխատեն: Քաղաքապետը իր մատնանշած վարչություններին երկու ամիս ժամանակ տվեց լուծումներ առաջարկելու համար.
«Երևանում ունենք կայանատեղիներ, որոնք որոշ փողոցներից պետք է դուրս գան, որպեսզի անընդհատ երթևեկությունն ապահովվի և խոչընդոտ չլինի։ Լուծումները շատ արագ պետք է քննարկվեն։ Տրանսպորտային խնդիրների լուծումը պետք է լինի մեր առաջնահերթությունը»:
Արփինե ՍԻՄՈՆՅԱՆ
Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը: