Արցախի իշխանությունները քաղաքական կոնսուլտացիաներ են սկսել ՀՀ խորհրդարանական և արտախորհրդարանական քաղաքական ուժերի հետ, հայտարարել է Արցախի Հանրապետության նախկին պետնախարար Նժդեհ Իսկանդարյանը:
Նա նշել է, որ 2026 թվականի խորհրդարանական ընտրություններից հետո Հայաստանի Հանրապետությունում նոր քաղաքական իրողություն է ձևավորվել, որը պետք է արտացոլվի նաև Արցախի հարցի և Արցախի իշխանությունների գործունեության վերաբերյալ քաղաքական մոտեցումներում, հայտնում է Aysor.am-ը:
«Կոնսուլտացիաների նպատակն է հստակեցնել՝ Հայաստանի քաղաքական ուժերը ինչպես են պատկերացնում Արցախի իշխանությունների հետագա գործունեությունն ու համագործակցությունը, ինչ դիրքորոշում ունեն Արցախի պետական ինստիտուտների պահպանման և Արցախի ժողովրդի իրավունքների պաշտպանության հարցերում, և ինչ պատրաստակամություն ունեն այս ուղղություններով գործնական քայլերի։
Այսօր արդեն ակնհայտ է, որ Արցախի իշխանությունների գործունեության դադարեցման կամ շարունակության հարցը չի կարող մնալ ենթադրությունների, առանձին հայտարարությունների կամ քաղաքական լռության մակարդակում։
2026 թվականի ընտրություններից հետո ձևավորված իրողությունը պահանջում է հստակ քաղաքական դիրքորոշումներ։ Եթե որևէ քաղաքական ուժ կարծում է, որ Արցախի իշխանությունների գործունեությունը պետք է դադարեցվի, ապա այդ դիրքորոշումը ևս պետք է հստակ և հրապարակային ձևակերպվի՝ քաղաքական պատասխանատվությամբ։
Եթե, հակառակը, քաղաքական ուժերը կարևորում են Արցախի պետական և քաղաքական ինստիտուտների շարունակականությունը, Արցախի ժողովրդի իրավունքների պաշտպանությունը և Արցախի հարցի պահպանումը Հայաստանի քաղաքական օրակարգում, ապա անհրաժեշտ է հասկանալ՝ ինչպիսի համագործակցության են նրանք պատրաստ և ինչ կոնկրետ քայլեր են պատրաստ իրականացնել»,-նշել է նա:
Իսկանդարյանը հավելել է, որ Արցախի իշխանությունները պատրաստ են այդ բաց և քաղաքական երկխոսությանը։
«Մենք չենք նախաձեռնում այս գործընթացը որևէ քաղաքական ուժի դիրքորոշումը կանխորոշելու համար։ Ընդհակառակը՝ ցանկանում ենք լսել բոլոր կողմերին և ստեղծված նոր պայմաններում ձևավորել հստակ, հասկանալի և պատասխանատու համագործակցության շրջանակ։
Քաղաքական կոնսուլտացիաների ընթացքում հենց այս հարցերի շուրջ էլ ակնկալում ենք հստակ պատասխաններ»,- նշել է նա։
Վարչապետ Նիկոլ Փաշինյանը հայտարարել է, որ Ղարաբաղյան շարժումը չի կարող շարունակվել և որ Արցախը թոկ էր Հայաստանի Հանրապետությունը «մոտակա ծառից» կապելու համար։: Նա նաև նշել է, որ բանակցային բոլոր գործընթացներն ու առաջարկները եղել են թոկը կարճացնելու մասին: