Սահմանազատման գործընթացում, հենց հերթը հասավ Հայաստանին հողերը վերադարձնելուն, օրինակ՝ Պառավաքարում (շուրջ 1400 հա), գործընթացը կանգ առավ։ Սեպտեմբերի 9-ին Տարածքային կառավարման, տեղական ինքնակառավարման, գյուղատնտեսության և շրջակա միջավայրի պահպանության հարցերի մշտական հանձնաժողովի նիստում այս մասին հայտարարել է «Ուժեղ Հայաստան» խմբակցության քարտուղար Տիգրան Աբրահամյանը։
Նա իշխանություններին կոչ է արել խոսել այն մասին, թե ինչ պետք է ստանա Հայաստանը, այլ ոչ թե այն մասին, թե ինչ պետք է տա։ «Մենք շատ բան ենք տվել, այլևս տալու ոչինչ չունենք։ Ընդ որում՝ Ադրբեջանը որևէ զիջման չի գնացել։ Ե՞րբ են մեզ վերադարձնելու մեր հողերը», — հարց է բարձրացրել պատգամավորը։
Նրա խոսքով՝ իշխանությունները ծրագրում են փակել շուրջ 220 դպրոց։ Աբրահամյանը վստահություն է հայտնել, որ ցանկության դեպքում կարելի է միջոցներ գտնել և չփակել Հայաստանի ռազմավարական կարևոր տարածաշրջանի՝ Սյունիքի մարզի շուրջ 40 դպրոցները։ Նա երկրի ղեկավարությանը կոչ է արել բարձրագույն մակարդակով հերքել դպրոցների փակման մասին տեղեկությունը։