Խանութներում և սրճարաններում սուրճի գները չեն նվազում բորսայական գնանշումների անկմանը զուգահեռ, քանի որ մանրածախ գները փոփոխվում են ուշացումով, իսկ հետո երկար ժամանակ պահպանվում են նոր մակարդակում: Այս մասին հայտնել է Բրազիլիայի Սուրճի արտահանողների խորհրդի նախագահ Մարսիու Ֆերեյրան։
Նյու Յորքի բորսայում սուրճի ֆյուչերսները վերջերս նվազել էին՝ հասնելով մոտավորապես 2.4 դոլարի՝ մեկ ֆունտի դիմաց, որից հետո կրկին բարձրացել էին՝ գերազանցելով 3 դոլարը։
«Խանութներում, սուպերմարկետներում և հատկապես արտերկրի սրճարաններում գործող ներկայիս գները դեռևս արտացոլում են ինչպես շուկայում դրան նախորդած աճը, այնպես էլ դրան հաջորդած կարճատև անկումը։ Մանրածախ գինը փոփոխվում է ուշացումով, սակայն շուկայի փոփոխությունից հետո պահպանվում է նոր մակարդակում», – ասել է Ֆերեյրան։
Եթե բորսայական գնանշումներն ավելի զգալի աճ գրանցեն, սպառողների համար գները նույնպես կարող են բարձրանալ, նախազգուշացրել է Ֆերեյրան։ Սակայն ներկայում, հատկապես համաշխարհային շուկայում նման միտում դեռևս չի նկատվում։
Միևնույն ժամանակ, հենց Բրազիլիայում գների նոր աճը կարող է տեղի ունենալ ավելի արագ, քան այլ երկրներում։ Սուրճի արտահանողների խորհրդի ղեկավարի խոսքով՝ քանի որ երկիրը արտադրող է, համաշխարհային գների փոփոխությունները ներքին շուկայում արտացոլվում են առանց այնպիսի ուշացման, որը բնորոշ է ներմուծող երկրներին։