Վանա լճի Աղթամար կղզում գտնվող Սուրբ Խաչ եկեղեցում ամենամյա պատարագի ավարտից հետո Պոլսո Հայոց պատրիարք Սահակ արքեպիսկոպոս Մաշալյանը հայտարարել է, որ այս տարի հատուկ աղոթք են հղել Հայաստան-Թուրքիա հարաբերությունների վերականգնման համար։
«Հատկապես այս տարի աղոթեցինք աշխարհի խաղաղության ու մարդկության եղբայրության համար։ Աղոթեցինք, որպեսզի Թուրքիա-Հայաստան հարաբերություններն ավելի բարելավվեն/կարգավորվեն։ Որովհետև այս հողերում ապրող ժողովուրդներն արժանի են խաղաղության։ Այդ պատճառով Աստծուց ողորմություն ենք խնդրում։ Թող այս խաղաղությունը գա այս հողերին և ժողովուրդներին։ Թող բոլորս միասին այս աշխարհը վերածենք այն գեղեցիկ սեղանի, որն Աստված պատրաստել է մեզ համար»,-ասել է նա, հայտնում է Ermenihaber-ը:
Պատարագը մատուցել է Պոլսի հայոց պատրիարք Սահակ Մաշալյանը և ԱՄՆ Արևելյան շրջանի հայկական եկեղեցու հոգևոր առաջնորդ, եպիսկոպոս Մեսրոպ Պարսամյանը։ Այն տևել է 2 ժամ:
Պատարագին ներկա են եղել Թուրքիայից, Հայաստանից, ԱՄՆ-ից, եվրոպական երկրներից և Իրանից ժամանած հայեր։
Սեպտեմբերի 6-ին Վանա լճի Սուրբ Խաչ հայկական եկեղեցում մատուցվել է 14-րդ պատարագը։ 2010-ից ի վեր ամեն տարվա սեպտեմբերին՝ Խաչվերացի տոնին հաջորդող կիրակի օրը, Սուրբ Խաչ եկեղեցում պատարագ է մատուցվում: