Դիտարկումների պատմության ընթացքում առաջին անգամ Իրանն արդեն մոտ յոթ շաբաթ է՝ Հորմուզի նեղուցով հում նավթի որևէ նշանակալի մատակարարում չի իրականացրել, հայտնում է Reuters-ը։ Ամերիկյան ծովային շրջափակումը հասել է նրան, ինչին տարիներ շարունակ գործող պատժամիջոցները չէին կարողացել հասնել՝ փակելով Թեհրանի արժութային եկամուտների հիմնական աղբյուրներից մեկը։
Ինչպես գրում է գործակալությունը, ի տարբերություն նախորդ պատժամիջոցային արշավների, երբ իրանական նավթը շարունակում էր հասնել գնորդներին, ներկայիս շրջափակումը դադարեցրել է հում նավթի նոր խմբաքանակների արտահանումը Չինաստան՝ իրանական էներգակիրների միակ խոշոր գնորդի ուղղությամբ։ Սա լրացուցիչ ճնշում է գործադրում երկրի պետական ֆինանսների և արժութային պահուստների վրա։ ԱՄՀ-ի գնահատմամբ՝ այս տարի Իրանում գնաճը կկազմի գրեթե 70%, ինչը աշխարհում երրորդ ամենաբարձր ցուցանիշն է՝ Վենեսուելայից և Սուդանից հետո։
Reuters-ի վկայակոչած Kpler, Vortexa և TankerTrackers.com հարթակների տվյալներով՝ այն բանից հետո, երբ ԱՄՆ-ն հուլիսի 14-ին կրկին շրջափակում սահմանեց Իրանի նկատմամբ, իրանական հում նավթի ոչ մի խմբաքանակ չի կարողացել հաջողությամբ անցնել Հորմուզի նեղուցով՝ Չինաստանի ուղղությամբ։
Արդյունքում, ինչպես գրում է գործակալությունը, Իրանը Չինաստանին կարող է նավթ վաճառել միայն Ասիայում գտնվող լցանավերում պահվող պաշարներից, սակայն դրանք համալրելու հնարավորություն չունի։
Vortexa-ի և Kpler-ի գնահատմամբ՝ օգոստոսին Իրանը օրական բեռնել է 220-255 հազար բարել նավթ և գազային կոնդենսատ։ Համեմատության համար՝ հուլիսին այդ ցուցանիշը կազմել է մոտ 740 հազար բարել, իսկ մարտին՝ շուրջ 2 միլիոն բարել։
TankerTrackers-ի համահիմնադիր Սամիր Մադանիի խոսքով՝ ներկայում նեղուցի ներսում գտնվում է 29 լցանավ՝ ընդհանուր 36.11 միլիոն բարել հում նավթով։
Շրջափակման գոտուց դուրս շարունակում են գործել Իրանի հետ կապված, այսպես կոչված, «ստվերային նավատորմի» տասնյակ լցանավեր։ Blackstone Compliance Services-ի տվյալներով՝ 51 նավ գտնվում է Օմանի ծոցում, ևս 81-ը մատակարարումներ է իրականացնում Ասիայում կամ սպասում Մալայզիայի ափերի մոտ։
Reuters-ին առևտրականները հայտնել են, որ իրանական նավթը շարունակում է բաց վաճառվել շուկայում․ ներկայում առաջարկվում են սեպտեմբերին և հոկտեմբերին Չինաստան մատակարարվելիք խմբաքանակներ։ Սակայն, նրանց խոսքով, հասանելի ծավալներն ավելի քիչ են, քան հուլիսին և օգոստոսին, քանի որ Պարսից ծոցից դուրս գտնվող լողացող պահեստներում նավթի պաշարները նվազում են նոր մատակարարումների բացակայության պատճառով։
Vortexa-ի տվյալներով՝ շրջափակման գծից արևմուտք գտնվող լողացող պահեստներում իրանական նավթի ծավալը օգոստոսի 26-ի դրությամբ աճել է մինչև 41.7 միլիոն բարել՝ հուլիսի վերջին գրանցված 35.5 միլիոնի դիմաց։ Միևնույն ժամանակ ծովում գտնվող լցանավերում պահվող իրանական նավթի ընդհանուր ծավալը 135 միլիոնից նվազել է մինչև 107 միլիոն բարել: