Մարդու իրավունքների պաշտպան Անահիտ Մանասյանի սեփական նախաձեռնությամբ ՊԵԿ նախկին նախագահ, ՀՀ ֆինանսների նախկին նախարար Գագիկ Խաչատրյանի վերաբերյալ համացանցում տարածված տեսանյութի առնչությամբ դրա հրապարակումից անմիջապես հետո սկսել է հարցի քննարկման ընթացակարգ։
Պաշտպանի հանձնարարությամբ այց է իրականացվում քրեակատարողական հիմնարկ՝ Գագիկ Խաչատրյանի հետ առանձնազրույց անցկացնելու, ինչպես նաև նրա իրավունքների ապահովման հետ կապված հանգամանքներն ուսումնասիրելու նպատակով, ասվում է ՄԻՊ հաղորդագրության մեջ:
Հարցի հետ կապված հիմնական հանգամանքներն ամբողջությամբ պարզելու համար իրավասու մարմիններից պահանջվել են համապատասխան պարզաբանումներ։
Այցի արդյունքները, ստացված պարզաբանումները և գործին վերաբերող բոլոր հանգամանքներն ամբողջական ուսումնասիրության ու ամփոփման ենթարկելուց հետո հնարավոր կլինի ներկայացնել Մարդու իրավունքների պաշտպանի հաստատության դիրքորոշումը։
Հրապարակման ենթակա տեղեկությունները Պաշտպանի աշխատակազմը կներկայացնի լրացուցիչ։
Գագիկ Խաչատրյանին 2 ամսով կալանավորելու վերաբերյալ քննիչի միջնորդությունը Հակակոռուպցիոն դատարանի կողմից բավարարվել է։ Համացանցում տեսանյութ է տարածվել, որտեղ երևում է, որ ԱԱԾ-ականները նրան անկողնուց են հանում և տեղափոխում պատգարակի վրա: Դատական նիստի ժամանակ նա պատգարակով է եղել:
Գագիկ Խաչատրյանի և նրա որդու բնակարաններում, ինչպես նաև նրանց հետ փոխկապակցված 21 ընկերությունների գրասենյակներում ու մասնաճյուղերում գործողություններ են իրականացվել։ Դրանք կատարվել են առանձնապես խոշոր չափերով կաշառք ստանալու և առանձնապես խոշոր չափերով փողերի լվացման դեպքերի առնչությամբ նախաձեռնված քրեական վարույթի շրջանակում։