Իրանի ԱԳՆ խոսնակ Էսմայիլ Բաղային Թեհրանի նկատմամբ ԱՄՆ-ի քաղաքականությունն անվանել է «մաքուր պարոդիա»։
«Վաշինգտոնը դիմում է Բահրեյնին՝ մի երկրի, որը գործնականում էական տնտեսական կապեր չունի Իրանի հետ, որպեսզի ապացուցի, թե իր «կոալիցիան» գործում է», — հինգշաբթի X սոցիալական ցանցում իր էջում գրել է Բաղային։
Նրա խոսքով՝ ԱՄՆ-ը նաև սահմանափակում է Իրանի հետ մարզական և ակադեմիական փոխանակումները, որոնք «փաստացի արդեն երկար տարիներ մեռած էին»։
«Նրանք պատժամիջոցներ են սահմանում նրանց դեմ, ովքեր արդեն պատժամիջոցների տակ են, և դատարկությունն անվանում են կոալիցիա», — ընդգծել է Իրանի արտաքին քաղաքական գերատեսչության ներկայացուցիչը։
Ավելի վաղ ԱՄՆ ֆինանսների նախարար Սքոթ Բեսենթը հայտարարել էր Իրանի դեմ պատժամիջոցների նոր ալիքի մասին՝ Վաշինգտոնի կողմից «Տնտեսական վտարանդի» գործողություն անվանվող արշավի շրջանակում։