Alphabet-ին պատկանող Google-ը 10 մլն-դոլարով ձեռք է բերում սնանկացած Spirit Airlines ավիաընկերության ներքին բիզնես տվյալները՝ հայտարարելով, որ նախատեսում է դրանք օգտագործել արտադրանքների մշակման և իր արհեստական բանականության մոդելների ուսուցման համար։ Այս մասին հաղորդում է Reuters-ը։
Հոդվածի համաձայն՝ ձեռք բերվող տվյալները ներառում են Spirit Airlines-ի աշխատակիցների էլեկտրոնային նամակները, Microsoft Teams-ի հաղորդագրությունները, էլեկտրոնային աղյուսակներն ու օրացույցները, ինչպես նաև մարքեթինգի, արտադրողականության և գործառնական գործունեության վերաբերյալ տվյալներ։
Reuters-ի փոխանցմամբ՝ գործարքի ավարտից առաջ տվյալները կապանձնավորվեն․ դրանք չեն պարունակի հաճախորդների մասին տեղեկություններ կամ այնպիսի անձնական տվյալներ, որոնք թույլ կտան նույնականացնել կոնկրետ անձանց։
ԱՄՆ սնանկության գործերով դատավորը չորեքշաբթի կայանալիք դատական նիստում կքննարկի տվյալների վաճառքը հաստատելու հարցը, նշվում է գործակալության նյութում։
Reuters-ի տվյալներով՝ Spirit-ը նաև 7.5 մլն դոլարի առաջարկ է ստացել արհեստական բանականության համար տվյալների ոլորտում գործող Mercor ընկերությունից։
Spirit-ը սնանկության ընթացակարգի շրջանակում վաճառում է իր ակտիվները այն բանից հետո, երբ մայիսին դադարեցրել է գործունեությունը՝ բարձր պարտքային բեռի և վառելիքի բարձր գների պատճառով։