ԱՄՆ նախագահ Դոնալդ Թրամփն ամերիկյան ռազմական ներկայությունը մեկ երրորդով կրճատելու հարցը դիտարկել է որպես ՆԱՏՕ-ի երկրներին ուղղված «ազդանշան», հաղորդել է CNN-ը՝ հղում անելով երկու տեղեկացված աղբյուրների։
«Նա հարցրեց, թե ինչ կլինի, եթե Եվրոպայում ամերիկյան զորքերը մեկ երրորդով կրճատի… Արդյո՞ք դա ճիշտ ազդանշան կուղարկի այսպես կոչված դաշնակիցներին», – գրել է հրատարակությունը՝ հղում անելով զրույցին ծանոթ աղբյուրներին։
Թրամփն այս գաղափարը հնչեցրել է գարնանը, մոտավորապես նույն ժամանակ, երբ Պենտագոնը հայտարարել է Եվրոպայում ԱՄՆ զորքերի ռոտացիաների չեղարկման և տարածաշրջանից որոշ զորքերի դուրսբերման մասին։
Աղբյուրներն ասել են, որ Թրամփի գաղափարը ծագել է դաշինքի կողմից Իրանի դեմ ԱՄՆ գործողություններին աջակցության բացակայության հետ կապված նրա դժգոհության ֆոնին։ Հունիսին Bloomberg-ը, հղում անելով աղբյուրներին, հաղորդել է, որ եվրոպական երկրները չեն կարողանում փոխարինել իրենց տարածքում տեղակայված ԱՄՆ ռազմական ակտիվների մի մասը, որոնք Վաշինգտոնը նախատեսում է կրճատել։